ՀՀ նախագահի թեկնածու Արամ Հարությունյանը «Փաստարկ» ակումբում հայտնեց, որ այսօր ԵԱՀԿ դիտորդներից մեկն իրեն հարց է տվել այն մասին, թե ո՞րն է իր առաքելությունը, ինչին պարոն Հարությունյանը պատասխանել է. «Ես ասացի, որ ինչպես Հայաստանի յուրաքանչյուր քաղաքացի, ուզում եմ ասել իմ խոսքը, դրա համար էլ ինքնառաջադրվեցի»:
Հարությունյանին վրդովեցնում է այն, որ իրեն պարբերաբար համարում են «ինչ- որ մեկի մարդը»: Նրա խոսքով՝ սկզբում բոլորին թվում էր, թե իր առաջադրվելով ինչ- որ մեկի պատվերն է կատարում, ասում էին՝ Ռոբերտ Քոչարյանի «մարդն է» , հետո խոսակցություններ եղան որ Հովիկ Աբրահամյանինն է, իսկ այժմ. «Հիմա ասեք ո՞ւմ պատվերն եմ կատարում, Ալ-Քաիդաի, թե՞ ում: Ես ցեխ չեմ շպրտում ոչ մեկի վրա, պարզապես ասում եմ այն, ինչ կա: Եթե այս ընտրություններին ընտրողների 46 տոկոսի թեկնածուն չկա, ուրեմն այն չի կարող լեգիտիմ լինել»:
Արամ Հարությունյանը շեշտեց, որ առաջադրվել է, որպեսզի ասի այն՝ ինչ բոլորը չեն ասում. «Ես հետ չեմ նահանջում, ես առաջ եմ գնում, հենց այս ձեւով, եւ ես առաջադրվել եմ ցույց տալու համար, որ ոչ մեկը չի կարող ինձ ստիպել չառաջադրվել»:
Եվա ՀԱԿՈԲՅԱՆ
