«Քարոզարշավի մեկնարկի օրվանից ընտրազանգվածի պասիվության մասին այլեւս կարելի է չխոսել»,- այսօր, լրագրողների հետ հանդիպման ժամանակ հասարակության բարոյահոգեբանական վիճակի մասին խոսելիս, ասաց հոգեբան Աննա Բադալյանը:
Հոգեբանի կարծիքով` Նոր տարվա ակտիվությունից հետո, որպես կանոն, հասարակության մոտ ձեւավորվել է հանրային ապատիկ վիճակ, որը շուտով կանցնի:
«Այսօր շատ են խոսում հասարակական պասիվությունից, բայց հասարակությանը պետք չէ մեղադրել: Պետք է հիշել էթնիկ տարրի մասին: Մեր ազգային ամենակարեւոր հատկանիշներից են տրամաբանությունը, վերլուծական կարողություններն ու ազգային կայուն հատկանիշները»,- նկատեց հոգեբանը` ընդգծելով, որ հայ հասարակությունը ամենաքաղաքականացվածներից մեկն է աշխարհում:
Մասնագետի համոզմամբ` հասարակության ակտիվությունը կհասնի իր գագաթնակետին հենց ընտրությունների օրը:
Կարդացեք նաև
«Ընտրազանգվածն, որպես կանոն, ավելի է ակտիվանում վերջին օրերին: Սա տեղի է ունենում ենթագիտակցորեն: Շատերը, տեսնելով, որ իրենց հարեւանները, ընկերները, բարեկամները մասնակցում են ընտրություններին, իրենք նույնպես ցանկանում են այդ գործընթացին մասնակից դառնալ»,- ասաց Ա. Բադալյանը` հավելելով, որ բողոքող հասարակությունը չպետք է պասիվ լինի ընտրություններին:
Aravot.am-ի այն հարցին, թե դեռ քարոզարշավից առաջ որոշ ՀՀԿ-ականների կողմից առաջ քաշած այն վարկածը, որ գործող նախագահը արժանի մրցակից չի ունենա կայանալիք ընտրություններին, արդյոք իր մեջ հոգեբանական ազդեցություն է պարունակում, հոգեբանը պատասխանեց.
«Բնական է, որ գործող նախագահից ընտրազանգվածի վրա որոշակի ազդեցություն կա: Սակայն կարեւոր է վերջին պահը, վերջին ակնթարթը, երբ ընտրողը իր համաձայնության նշանն է դնում այս կամ այն թեկնածուի անվան մոտ: Բացի դրանից, հասարակության մեջ տարածված կարծիք կա, որ գործող նախագահին արժանի մրցակիցներ կարող են լինել Րաֆֆի Հովհաննիսյանն ու Հրանտ Բագրատյանը»:
Հոգեբան Աննա Բադալյանի կարծիքով` ընտրություններում կհաղթի այն թեկնածուն, ով ավելի լավ կտիրապետի հռետորական ձիրքին:
Աշոտ ԱԹԱՅԱՆ
