«Վանաձոր Քիմպրոմ» ՓԲԸ տարածքում նախօրեին հնչած պայթյունի պատճառը դեռեւս հայտնի չէ, հանգամանքներն էլ դեռ ճշտվում են:
Ինչպես Aravot.am–ին հայնտնեցին ՀՀ Ոստիկանության Վանաձորի բաժնից, պայթյունի հետեւանքով մահացած 22-ամյա Դավիթ Ասատրյանի մահվան փաստով քրեական գործ է հարուցվել ՀՀ քրօրի 231 հոդվածի 2-րդ մասի (պայթյունավտանգ օբյեկտներում անվտանգության կանոնները խախտելը, որը առաջացրել է մարդու մահ) հատկանիշներով:
«Նոր տեղեկություններ այս պահի դրությամբ չկան, նախաքննություն է ընթանում, իսկ թե իրականում ինչն է եղել պայթյունի պատճառը, դեռ ոչինչ այդ մասին չեմ կարող հայտնել»,-մեզ հետ զրույցում նշեց քննիչ Ա. Մնացականյանը, ում վարույթում էլ գտնվում է գործը:
Երեկ առավոտյան ժամը 10.00-ին, ոստիկանության Վանաձորի բաժնում ահազանգ էր ստացվել, ըստ որի «Վանաձոր Քիմպրոմ» ՓԲԸ տարածքում պայթյուն է տեղի ունեցել:
Մեկնած օպերատիվ խումբը պարզել էր, որ նույն օրը, ժամը 09.40-ի սահմաններում, Վանաձոր քաղաքի Վարդանանց փողոցի թիվ 2 հասցեում գործող «Վանաձոր Քիմպրոմ» ՓԲԸ գազի արտադրամասում ամոնիակի տարա է պայթել, ինչի հետևանքով արտադրամասի ապարատավար, 1990 թ. ծնված Դավիթ Ասատրյանը ստացած վնասվածքներից տեղում մահացել է, իսկ նույն արտադրամասի բանվոր, 1986 թ. ծնված Արթուր Հ.-ն ստացել էր վերին վերջույթների վնասվածքներ:
Կարդացեք նաև
«Վանաձոր Քիմպրոմ ՓԲԸ-ից Aravot.am-ին հայտնեցին, որ արդեն իսկ պայթյունի հետեւանքով մահացած Դավիթ Ասատրյանի ընտանիքին օգնություն է ցուցաբերվել եւ այսուհետ պատրատ են ամեն կերպ աջակցել նրա ընտանիքին:
«Դավիթ Ասատրյանը լավ մասնագետ էր, եւ ցանկանում էր խորացնել գիտելիքները հենց քիմիական ոլորտում: Մեզ համար սա մեծ ցավ է, ամենացավալին ոչ թե պայթյունն է` արտադրությանը հասցրած իր վնասներով, այլ մեզ համար միակ վնասը երեխայի կորուստն է: Ամեն կերպ աշխատում ենք Դավիթի ընտանիքի կողքին լինել, փոխհատուցում է տրվելու, օգնելու ենք ամեն կերպ«,-մեզ հետ զրույցում տեղեկացրին «Վանաձոր Քիմպրոմ« ՓԲԸ-ից:
Նրանց փոխանցմամբ մահացած Դավիթ Ասատրյանը զույգ եղբայր ունի:
Պայթյունի ձայնը ոչ միայն լսելի է եղել գործարանի տարածքին մոտ ապրող վանաձորցիներին, այլ նաեւ քաղաքի տարբեր հատվածներում:
«Ահավոր պայթյուն էր, մենք մեր տանը նստած դմբոց լսեցինք, պատուհանները դղրդացին»,-ասում է վանաձորաբնակ Շուշաննա Խառատյանը:
«Մտածեցինք երկրաշարժ է, բայց հետո իմացանք լուրը, որ գործարանի տարածքում պայթյուն է եղել»,-իր հերթին նշում է մեկ այլ վանաձորցի, ով նույնպես այդ պահին գտնվելիս է եղել բնակարանում:
Անուշ ԲՈՒԼՂԱԴԱՐՅԱՆ
