Վեյկ-ան Զեեում ընթացող «Tata Steel» շախմատի 75-րդ փառատոնի մասնակիցները երկրորդ եւ վերջին հանգստյան օրվանից հետո այսօր վերսկսում են պայքարը:
Ուժեղագույնների խմբում Հայաստանի լավագույն շախմատիստ Լեւոն Արոնյանն իներորդ տուրում սեւերով խաղալու է հոլանդացի գրոսմայստեր Էրվին Լ՝Ամիի հետ, Սերգեյ Մովսիսյանի («B» խումբ) մրցակիցն այսօր Ռուսաստանի ներկայացուցիչ Մաքսիմ Տուրովն է, իսկ «C» խմբում բրազիլահայ Գրիգոր-Սեւակ Մխիթարյանը հանդիպելու է տանտերերից կանանց գրոսմայստեր Լիզա Շուտի հետ: Հիշեցնենք, որ ութ տուրից հետո Արոնյանը 5,0 միավորով ընթանում է երրորդ տեղում, Մովսիսյանը 5,5 միավորով բաժանում է 1-3-րդ տեղերը եւ լրացուցիչ գործակիցներով երկրորդն է, իսկ Մխիթարյանը վաստակել է 4,0 միավոր եւ ընթանում է մրցաշարային աղյուսակի վեցերորդ հորիզոնականում:
Աշոտ ՀԱԿՈԲՅԱՆ
