Ավանի մշակույթի տանը ՀՀ նախագահի թեկնածու, գործող նախագահ Սերժ Սարգսյանն այսօր իր առաջին նախընտրական հանդիպումը ունեցավ ընտրողների հետ: Մշակույթի տան դիմաց նրան դիմավորեցին ավանաբնակ կարկառուն ՀՀԿ-ականները` նախկին պատգամավոր Ռուբեն Հայրապետյանը, Երեւանի քաղաքապետ Տարոն Մարգարյանը, նրա աներորդի` նորաթուխ պատգամավոր Ռոբերտ Սարգսյանը, նախկին պատգամավոր Գագիկ Մելիքյանը, Ավան վարչատարածքային շրջանի ղեկավարը եւ նրանց ստորադաս ՀՀԿ-ականներ: Մշակույթի տան փոքր դահլիճը լեփ-լեցուն էր, ու, դատելով ներկաների հագուկապերից, պատահական մարդիկ չկային:
Ի դեպ, նախագահական քարոզարշավում ՀՀԿ-ն շարունակում է խորհրդարանական քարոզարշավի ժամանակ ձեւավորած ավանդույթը`լրագրողները հանդիպումների տեղի եւ ժամի մասին տեղեկանում են վերջին ժամերին: Այսօր մի նոր դրսեւորում էլ եղավ. հանդիպումի մեկնարկից կես ժամ անց լրագրողներին խնդրեցին լքել դահլիճը` պատճառաբանելով, որ այդքան ժամանակ էր նախատեսված լրագրողների ներկայության համար:
Այսօրվա հանդիպումից ակնհայտ դարձավ, որ Սերժ Սարգսյանն այս անգամ էլ, ինչպես խորհրդարանական քարոզարշավի ժամանակ, միայնակ է կրելու քարոզարշավի բեռը: Դահլիճի առաջին շարքում նստած ՀՀԿ-ականները ուշադիր ունկնդրում էին առաջնորդին:
Կարդացեք նաև
Իսկ Սերժ Սարգսյանն իր խոսքը բացեց նրանով, որ իր առաջարկով մի խումբ երիտասարդների հետ պայմանավորվել են` ազատ եւ արդար ընտրություններ իրականացնել: Այդ երիտասարդների հետ նա հանդիպել էր երկու ժամ առաջ` իր քարոզարշավի մեկնարկին եւ նախընտրական հոլովակը ներկայացնելիս:
Նա եւս մեկ անգամ կրկնեց, որ երկրում քաղաքական գործընթացները ե, ընդհանրապես, մեծ պրոցեսները միայն իշխանությունների ցանկություններով չեն լինում` չժխտելով, որ թիվ մեկ պատասխանատուն մնում է իշխանությունը:
Սերժ Սարգսյանը վստահություն հայտնեց, որ ցրտաշունչ ձմռան պայմաններում առաջին նախընտրական հանդիպման ժամանակ ընտրողների հաղորդած ջերմությունն իրեն ու իր թիմին կուղեկցի հանրապետության ողջ տարածքում: Նա ընտրողներից հայցեց` նայել իր անցած ճանապարհը եւ կատարել ընտրություն: Ներկայացրեց իր նախընտրական ծրագրի որոշ դրույթներ:
Նելլի ԳՐԻԳՈՐՅԱՆ
