Տավուշի մարզի Աճարկուտ գյուղի բնակիչ, 1960թ. ծնված Վարդգես Ռեւազյանին մեղադրանք էր առաջադրվել , որ նա 2012թ. նոյեմբերի սկզբներին «Հայանտառ» ՊՈԱԿ Գետաշենի անտառպետության անտառամասից ապօրինի կերպով հատել է 366 հազար 750 դրամ սակագնային արժեքով, ընդհանուր 1 միլիոն 100 հազար 250 դրամ նյութական վնասով թաց կանգուն ծառեր: Նույն գյուղի բնակիչ, 1978թ. ծնված Սասուն Մելիքյանին մեղադրանք էր առաջադրվել, որ 2012թ. նոյեմբերի սկզբներին «Հայանտառ» ՊՈԱԿ Կիրանցի անտառպետության անտառամասից ապօրինի կերպով հատել է 366 հազար 750 դրամ սակագնային արժեքով, ընդհանուր 1 միլիոն 10 հազար 250 դրամ նյութական վնասով 7 հատ լորենի տեսակի թաց կանգուն ծառեր:
Բացի այդ, Ս. Մելիքյանը մեղադրվում է այն բանում, որ 2012թ. նոյեմբերի 17-ին ոստիկանության Իջեւանի բաժնում կեղծ տեղեկություն է տվել, թե իբր վերոհիշյալ ծառերից ստացված գերանափայտերր անտառից դուրս բերելու համար ինքն անտառապետ Կ. Փարսադանյանին, վերջինիս պահանջով, տվել է 80 հազար դրամ: Աճարկուտ գյուղի բնակիչ,1976թ. ծնված Վարդան Օհանյանին մեղադրանք է առաջադրվել, որ նա 2012թ. նոյեմբերի սկսզբին Սասուն Մելիքյանից եւ Վարդգես Ռեւազյանից գնել է ակնհայտ հանցավոր ճանապարհով , առանց համապատասխան փաստաթղթերի ձեռք բերված, ընդհանուր 1 միլիոն 248 հազար 380 դրամ արժողության լորի եւ հացի տեսակի գերանափայտեր:
Վարդան Օհանյանին մեղադրանք էր առաջադրված ՀՀ քրեական օրենսգրքի 216 հոդվածի 2-րդ մասի առաջին կետով(«Ակնհայտ հանցավոր ճանապարհով գույք ձեռք բերելը կամ իրացնելը»): Այդ հոդվածը նախատեսում է տուգանք՝ նվազագույն աշխատավարձի երեքհարյուրապատիկից հինգհարյուրապատիկի չափով կամ ազատազրկում՝ առավելագույնը 2 տարի ժամկետով: Վարդգես Ռեւազյանին մեղադրանք էր առաջադրված ՀՀ քրեական օրենսգրքի 296-րդ հոդված 1-ին կետով «Ծառերի , թփերի եւ բուսածածկի ապօրինի հատումը»: Այդ հոդվածը նախատեսում է տուգանք՝ նվազագույն աշխատավարձի հինգհարյուրապատիկից յոթհարյուրապատիկի չափով, կամ կալանք՝առավելագույնը 2 ամիս ժամկետով: Սասուն Մելիքյանին մեղադրանք էր առաջադրված ՀՀ քրեական օրենսգրքի 296-րդ հոդվածի 1-ին կետով եւ 333-րդ հոդվածի 1-ին մասով (« Սուտ մատնություն»): Վերջին հոդվածը նախատեսում է տուգանք՝ նվազագույն աշխատավարձի երկուհարյուրապատիկից չորսհարյուրապատիկի չափով կամ կալանք՝ 1-3 ամիս ժամկետով կամ ազատազրկում՝առավելագույնը 2 տարի ժամկետով: Սույն գործով կայացել է արագացված դատաքննություն: Հունվարի 21-ին Տավուշի մարզի առաջին ատյանի դատարանի դատավոր Զոյա Զաքինյանը Վարդան Օհանյանին դատապարտեց՝ 300 հազար, Վարդգես Ռեւազյանին՝ 500 հազար, իսկ Սասուն Մելիքյանին ՝ 550 հազար դրամ տուգանքի:
Ոսկան ՍԱՐԳՍՅԱՆ
