«Արդշինինվեստբանկ» ՓԲԸ-ին պատկանող բանկոմատի չհրկիզվող պահարանից նոյեմբերի 26-ին արձանագրված գողության դեպքը բացահայտվել է և երեք անձ կալանավորվել է, ևս մեկի նկատմամբ հայտարարվել է հետախուզում։
2012թ. նոյեմբերի լույս 26-ի գիշերը տեխնիկական միջոցի գործադրմամբ բացել են Ախուրյան-Գյումրու խճուղի 6 հասցեում գտնվող Վահան Մխիթարյանին պատկանող խանութ-տաղավարի համար նախատեսված շինության մուտքի դուռը, և կտրել գողացել են «Արդշինինվեստբանկ» ՓԲԸ-ին պատկանող բանկոմատի չհրկիզվող պահարանը, որի մեջ եղել է 1.854.000 ՀՀ դրամ գումար:
Նախաքննության ընթացքում ձեռնարկված քննչական և օպերատիվ-հետախուզական միջոցառումների արդյունքում պարզվել է, որ Տավուշի մարզի Հաղարծին գյուղի բնակիչներ` Դավիթ Թամրազյանը, Ռուստամ Բաբինյանը, Գևորգ Բաբինյանը և Աշոտ Բադալյանը 2012թ. նոյեմբերի 25-ի գիշերը Ռուստամ Բաբինյանին պատկանող «Ֆորդ-Տրանզիտ» մակնիշի 83 PT 333 պետհամարանիշի և Դավիթ Թամրազյանին պատկանող «Մերսեդես-C» մակնիշի 24 ՍԼ 476 պետհամարանիշի ավտոմեքենաներով, գնացել են Ախուրյան գյուղ, բացել Վահան Մխիթարյանին պատկանող խանութ-տաղավարի մուտքի դուռը, էլեկտրական սղոցի գործադրմամբ կտրել և գողացել են նշված տարածքում տեղադրված «Արդշինինվեստբանկ» ՓԲԸ-ին պատկանող բանկոմատի չհրկիզվող պահարանը։ Իրավապահները պարզել են, որ չհրկիզվող պահարանը տեղադրվել է Ռուստամ Բաբինյանին պատկանող «Ֆորդ տրանզիտ» մակնիշի ավտոմեքենան և տեղափոխվել Տավուշի մարզի Հաղարծին գյուղ, որտեղ էլեկտրական սղոցի գործադրմամբ կտրել, բացել են բանկոմատի չհրկիզվող պահարանի դուռը, որից հետո գումարը վերցրել են, իսկ պահարանը գցել Աղստև գետը։ Ի դեպ, այն արդեն հայտնաբերվել և առգրավվել է, որի տեղը ըստ մեր ունեցած տեղեկությունների մատնացույց են արել մեղադրյալները։
Դավիթ Թամրազյանին, Ռուստամ Բաբինյանին և Գևորգ Բաբինյանին 09.12.2012թ. մեղադրանք է առաջադրվել ՀՀ քր. օր-ի 177 հոդվածի 2-րդ մասի 1-ին, 2-րդ և 3-րդ կետերով, որպես խափանման միջոց է կիրառվել կալանավորումը: Իսկ Ա.Բադալյանի նկատմամբ հայտարարվել է հետախուզում։
