Այսօր «Ժառանգության» առաջնորդ Րաֆֆի Հովհաննիսյանը Օպերայում իր նախընտրական քարոզարշավի ժամանակ պատասխանեց նաեւ լրագրողների հարցերին: Անդրադառնալով իր նամակին՝ ուղղված Սերժ Սարգսյանին՝ նա ասաց. «Եթե որեւէ մեկը, որեւէ մարզպետ, շտաբի պետ, գյուղապետ, ոստիկան, կուղղորդվի դեպի խախտում, ահաբեկում մեր քաղաքացիներին, այդ ընտրությունն արդեն գոյություն չի ունենալու, վերջացած կլինի: Ես սպասում եմ պատասխանին եւ հույս եմ տածում, որ մինչեւ փետրվարի 14-ը պարոն Սարգսյանը ամեն ինչ կանի հրապարակավ, ոչ թե իր միջնորդների միջոցով ռեպլիկ անելու համար, այլ ըստ էության ապահովելու Սահմանադրությունը»:
Հարցին՝ Ձեզ արդեն պատասխանել են եւ խնդրել՝ օրենքին համապատասխան դարձնել Ձեր պահանջը, Դուք դեռ պնդո՞ւմ եք՝ նա պատասխանեց. «Ես կարծում եմ, որ դա անգամ նախընտրական քաղաքական հայտարարությունների տիրույթից չէ: Ես ասել եմ, թե ինչպես պետական իշխանությունը բանեցվում է մեր ժողովրդի վրա: Ես պետք չունեմ որեւէ պետական ուղեկցության, թող որեւէ պետական միջոց չվատնեն ինձ վրա: Ես ապահով եմ իմ հայրենիքում: Իսկ եթե շարունակեն ՀՀ տարբեր քաղաքներում քաղաքացիների լուսանկարումը, ահաբեկումը՝ իմ պատասխանը կստանան: Կունենանք հերթական կեղծված ընտրությունը: Ես դա չեմ ուզում: Կամ այդ պայմանները իրապես կապահովեն, հետ կկանչեն այդ «լավ տղաներին»՝ պետական ծառայողներին ապօրինի գործունեությունից, կամ մենք կունենանք հերթական հույզեր եւ այդ ամեն ինչը՝ ընտրական հեղափոխության հավատամքը կփոխի հետընտրականն անկանխատեսելի զարգացումների: Իսկ ես դա չեմ ուզում»:
Հռիփսիմե ՋԵԲԵՋՅԱՆ
