«Ստամբուլը դառնում է ՄԱԿ-ի եվրոպական գրասենյակի կենտրոն, սա շատ վտանգավոր է մեր երկրի համար: Հայերին կարելի է ոչնչացնել անգամ մեկ փամփուշտ չօգտագործելով»,-այսօր ՄԱԿ-ի Զարգացման ծրագրի Եվրոպական տարածաշրջանային գրասենյակի Բրատիսլավայից Թուրքիա, Ստամբուլ նախատեսվող տեղափոխման կապակցությամբ իր կարծիքն արտահայտեց «Հանուն կայուն մարդկային զարգացման» ասոցիացիայի նախագահ Կարինե Դանիելյանը:
Նրա պնդմամբ Թուրքիայի եւ Ադրբեջանի քաղաքացիները աշխատում են միջազգային կառույցների շատ կենտրոններում եւ դա չի կարող չանդրադառնալ մեր երկրի վրա:
ՀՀ քաղաքացիական հասարակության ներկայացուցիչները նամակ են ուղարկել ՄԱԿ-ի գլխավոր քարտուղար՝ պարոն Բան-Կի-Մունին: Նամակը ստորագրել են 15 կազմակերպություններ եւ նշել, որ անտրամաբանական եւ ոչ նպատակահարմար է այս գրասենյակի տեղափոխությունը մի երկիր, որը իրագործել է հայ ժողովրդի եղեռն իր իսկ պատմական հայրենիքում, ով 20 տարի շարունակ ՀՀ պահում է շրջափակման մեջ, խրախուսում է անհանդուրժողականությունը ազգային փոքրամասնությունների նկատմամբ, չունի դիվանագիտական հարաբերություններ տարածաշրջանային որոշ պետությունների հետ եւ վերջապես գտնվում է ոչ ստաբիլ ռեգիոնում, հաշվի առնելով զինված հակամարտությունները:
«Դիմել ենք ՄԱԿ-ին հույս ունենալով, որ նա հարազատ կմնա իր սզբունքներին: Նպատակ ունենք նաեւ դեսպանների հետ հանդիպել: Դեպքը թարմ է եւ ժամանակ է պետք: Մենք լիարժեք չենք պատկերացնում վտանգը»,-հավելեց Կարինե Դանիելյանը:
Կարդացեք նաև
«Տապան Էկո-ակումբ» ՀԿ նախագահ Հրանտ Սարգսյանի խոսքով լուրջ աշխատանք է հարկավոր տանել, մարդու իրավունքների խախտում է տեղի ունենում Թուրքիայում, բոլորի համար դա բացահայտ է.
«Կան կրոնական ազատությունների սահմանափակում, Իզրաելի հետ սրված հարաբերություններ, Կիպրոսի խնդիրը՝ ոչ պատերազմ, ոչ խաղաղաություն, Հայաստանի հետ վերջին 20 տարում վերաբերմունքը անտանելի է: Չի կարող Թուրքիան իրականացնել Մակ-ի գործունեությունները եւ պահպանել ՄԱԿ-ի անդամ երկրների շահերը: Տարիների ընթացքում ՄԱԿ-ի ազդեցությունը անկում է ապրել նրան անդամակցած երկրների հասարակությունների շրջանակներում: Նա իր հեղինակությունը պետք է մի կերպ բարձրացնի»:
Անժելա ՇԱՀՈՒՄՅԱՆ
