2011թ. նոյեմբերի 13-ին Իջեւանում կայացան քաղաքապետի ընտրություններ, որոնց արդյունքում 1999թ.-ից Իջեւանը ղեկավարող Վարուժան Ներսիսյանին փոխարինեց Վարդան Ղալումյանը:Վերջինս ծառայողական պարտականությունները պետք է ստանձներ դեկտեմբերի 22-ին, սակայն Վ. Ներսիսյանը չի ազատել աշխատասենյակը, որի պատճառով Վարդան Ղալումյանը քաղաքապետի պարտականությունների կատարմանն անցել է դեկտեմբերի 26-ին:
Այդ օրը Իջեւանի քաղաքապետարանի աշխատակազմի գլխավոր մասնագետ Աստղիկ Եգանյանը, որն այդ ժամանակ փոխարինում էր քաղաքապետարանի գույքահարկի բազայի աշխատողին, նախկին քաղաքապետ Վարուժան Ներսիսյանի դրդմամբ մի օբյեկտի վերջին 5 տարվա գույքահարկի 1 միլիոն 900 հազար դրամ պարտքից գույքահարկի բազայում մուտքագրել է 1 միլիոն 123 հազար դրամ: Իրականում պարտքը մարվել է միայն համակարգչում, այդ գումարը չի մուծվել: Սակայն նոր քաղաքապետ Վարդան Ղալումյանը հասկացել է կատարվածը:
Դրա մասին Աստղիկ Եգանյանը տեղյակ է պահել Վարուժան Ներսիսյանին: Վերջինս 2012թ. հունվարի 26-ի երեկոյան զանգահարել է քաղաքապետարանի աշխատակից Մարինե Գրիգորյանին` նրանից խնդրելով այն աշխատասենյակի բանալին ,որտեղ գտնվում է գույքահարկի բազայի տվյալներով համակարգիչը:
Նույն գիշերը Աստղիկ Եգանյանը նախկին քաղաքապետ Վարուժան Ներսիսյանի ավտոմեքենայով ժամանել է քաղաքապետարանի շենք, մտել այդ աշխատասենյակ եւ փորձել համակարգչում վերականգնել նախնական իրավիճակը, այսինքն` ցույց տալ այդ հիմնարկի ունեցած գույքահարկի պարտքի իրական չափը: Աստղիկ Եգանյանին համակարգչային այդ գործողությունը չի հաջողվել եւ նա առավոտյան Վարուժան Ներսիսյանի ավտոմեքենայով քաղաքապետարանի շենք է եկել երկրորդ անգամ: Ի վերջո Աստղիկը «վերականգնել» է այդ հիմնարկի գույքահարկի պարտքը: Սակայն քաղաքապետարանում կատարվածը պարզվել է, Աստղիկ Եգանյանը քաղաքապետ Վարդան Ղալումյանի մոտ ընդունել է իր կատարած ապօրինությունը:
Կարդացեք նաև
Աստղիկ Եգանյանը, Մարինե Գրիգորյանը, քաղաքապետարանի պահակ Արմեն Օթարյանը կատարվածի մասին զեկուցագրեր են գրել քաղաքապետ Վարդան Ղալումյանին, որտեղ ներկայացրել են կատարվածը:
Նշենք, որ գույքահարկի տվյալներով համակարգչի սենյակի բանալին Աստղիկին տրամադրած Մարինե Գրիգորյանը Իջեւանի պահակային ծառայության պետ Գագիկ Գրիգորյանի հարազատ քույրն է: Աստղիկ Եգանյանը, Մարինե Գրիգորյանը ներկայումս Իջեւանի քաղաքապետարանում չեն աշխատում:
Քաղաքապետ Վ. Ղալումյանը կատարվածի առթիվ գրավոր դիմել է Տավուշի մարզի դատախազություն: Դատախազությունից տեղեկացանք, որ ոստիկանության հետաքննության ծառայությունը կատարված դեպքերից մեկ տարի անց մերժել է քրեական գործի հարուցումը, քանի որ կատարված գործողություններում հանցակազմ չկա, դրանք հետեւանք չեն առաջացրել: Քաղաքապետ Վարդան Ղալումյանին գրավոր չեն հայտնել, որ քրեական գործի հարուցումը մերժված է: Քաղաքապետը տարակուսանք հայտնեց քրեական գործ չհարուցելու առթիվ, ասելով.
-Եթե կողոպտիչները մի բանկ թալանեին, հաջորդ գիշեր վնասը վերականգնեին, ուրեմն ` քրեական գործ չէր հարուցվելո՞ւ:
Ոսկան ՍԱՐԳՍՅԱՆ
