Տավուշի մարզի Իծաքար գյուղի 38-ամյա բնակիչ Ռոբերտ Հարությունյանը եւ Պառավաքար գյուղի 34-ամյա բնակիչ Սամվել Գրիգորյանը մեղադրվում էին այն բանում, որ 2011 թվականի դեկտեմբերից մինչեւ 2012թ. փետրվար ամիսն ընկած ժամանակահատվածում սեռական հարաբերություն են ունեցել Իծաքար գյուղի բնակչուհի, 1996թ. նոյեմբերին ծնված Տ. Գ.-ի հետ: Երկու տղամարդիկ էլ ամուսնացած են, Ռ. Հարությունյանը չի աշխատում, իսկ Ս. Գրիգորյանը պայմանագրային զինծառայող է: Ս. Գրիգորյանը պաշտպան չուներ դատարանում, Ռ. Հարությունյանն օգտվում էր պաշտպանի ծառայություններից: Ռ. Հարությունյանն ընդհանրապես չընդունեց իր մեղքը, իսկ Ս. Գրիգորյանը իր մեղքը մասամբ ընդունեց: Ամբաստանյալները մեղադրվում էին ՀՀ քրեական օրենսգրքի 141 հոդվածով («Սեքսուալ բնույթի գործողություններ կատարելը տասնվեց տարին չլրացած անձի հետ»), որը նախատեսում է տուգանք՝ նվազագույն աշխատավարձի հարյուրապատիկից երկուհարյուր հիսունապատիկի չափով կամ ազատազրկմամբ՝ առավելագույնը երկու տարի ժամկետով: Նրանց նկատմամբ, որպես խափանման միջոց, կիրառվել է չհեռանալու մասին ստորագրությունը: Դատավոր Զոյա Զաքինյանի որոշմամբ դատավարություն անցկացվել է դռնփակ: Դեկտեմբերի 17-ին Տավուշի մարզի առաջին ատյանի դատարանը Սամվել Գրիգորյանին եւ Ռոբերտ Հարությունյանին դատապարտեց 150 -ական հազար դրամի տուգանքի: Դատարանը դատավճիռ կայացնելիս հաշվի է առել,որ Սամվել Գրիգորյանը անչափահաս 5, Ռոբերտ Հարությունյանը ՝ 2 երեխա ունի, նրանք նախկինում դատված չեն եղել, բնութագրվում են դրականորեն:
Ոսկան ՍԱՐԳՍՅԱՆ
