ԵԽԽՎ միջազգային դիտորդական առաքելության հիմնական պատվիրակությունը՝ 22 անդամից բաղկացած, Երեւան կժամանի փետրվարի կեսերին՝ ՀՀ նախագահական ընտրությունների դիտարկման համար: Իսկ մինչ այդ նախընտրական առաքելություն իրականացնող խումբը ժամանել է՝ տրամադրվածությունն ու իրավիճակը ստուգելու: Այսօր հրավիրած ասուլիսում դիտորդներն ասացին, որ ԱԺ նախագահ Հովիկ Աբրահամյանի հրավերով արդեն հանդիպումներ են ունեցել խմբակցությունների ղեկավարների հետ: Հանդիպել են նաեւ հ/կ-ների ներկայացուցիչների, Երեւանում հավատարմագրված դիվանագետների հետ: Նրանց խոսքերով՝ «Այն խոշոր կուսակցությունները, որոնք ստացել են 30 տոկոս ձայն, ակնկալվում էր, որ պետք է որ մասնակցեին նախագահական ընտրություններին: Տարբեր թեկնածուներ նախագահի ընտրություններին չառաջադրվելու համար տարբեր պատճառներ մատնանշեցին: Առկա անտարբերության եւ անվստահության երեւույթը կապ չունի նախագահի թեկնածու չառաջադրելու որոշման հետ»: Դիտորդներն իրենց հայտարարությունն անելուց հետո 1-2 հարցի պատասխանեցին:
Aravot.am-ը պատվիրակության անդամներից հետաքրքրվեց՝ այսօր դուք հանդիպում եք ունեցել ՀԱԿ խմբակցության ղեկավար Լեւոն Զուրաբյանի հետ, նա եւ ընդհանրապես մյուս խմբակցությունների ղեկավարները հատկապես ի՞նչ մտահոգություններ հայտնեցին՝ ընտրությունների հետ կապված:
Պատվիրակության անդամ Ստեֆան Շենաքը պատասխանեց. «Երեք կուսակցությունների հետ մենք խոսեցինք այն պատճառների մասին, որոնց հիման վրա նրանք որոշեցին չմասնակցել ընտրություններին: Ժողովրդավարության պայմաններում ամեն կուսակցություն ինքն է որոշում մասնակցության կամ չմասնակցության մասին: Թիկունքում կարող են լինել ռազմավարության հետ կապված պատճառներ, բայց մեր պատվիրակության համար կարեւոր էր լսել նրանցից, որ այդ երեք խմբակցությունները իրենց ընտրողներին բոյկոտի կոչ չեն անում: Ընտրությանը մասնակցելը ժողովրդավարության կարեւորագույն արժանիքն է, կարեւոր էր լսել, որ ընտրողներին բոյկոտի կոչ չանեն»:
Հարցին՝ եթե բոյկոտի կոչ անեին, ի՞նչ կլիներ արդյունքում, դա ժողովրդավարական ստանդարտներով ի՞նչ կնշանակեր՝ պատվիրակության նախագահ Քերեն Ուոլդսեթը պատասխանեց. «Նման խնդիր չկա իրականում, իրենք չեն նշել, որ նման խնդիր կա: Մենք նախընտրական այցով ենք եկել, հետո կլինի ասուլիս»,- հարցի հետ բացարձակ չառնչվող պատասխան տվեց նա:
Կարդացեք նաև
Հռիփսիմե ՋԵԲԵՋՅԱՆ
