«Կոնկրետ գործերի առնչությամբ կխոսենք հետո, առանձին: Հիմա քննարկում ենք, ունենք ժամանակ համապատասխան վերաքննիչ բողոք բերելու կամ չբերելու հարցի վերաբերյալ, արդյունքների մասին լրացուցիչ կհայտնենք»,-այսօր ասուլիսի ժամանակ Մատաղիսի գործի վերաբերյալ լրագրողների հարցերին ի պատասխան՝ ասաց գլխավոր զինդատախազ Գեւորգ Կոստանյանը:
Հարցին՝ կարելի՞ է Մատաղիսի գործը համարել ձեր կոկորդին կանգնած ոսկոր, պարոն Կոստանյանն ասաց. «Որեւէ գործ որեւէ մեկի կոկորդին կանգնած չէ: Եվ իմ նախորդները, եւ ես կատարում ենք մեր ծառայողական պարտականությունները»:
Հարցին՝ գործը համարո՞ւմ եք բացահայտված, պարոն Կոստանյանն ասաց՝ երբ կկողմնորոշվենք դատական ակտի բողոքարկման հարցում, հետո կխոսենք մանրամասն:
Նա հրաժարվեց տեղեկություններ տրամադրել գոմեշի մսի գործով քննության վերաբերյալ:
Կարդացեք նաև
Անդրադառնալով ԶՈՒ հանցագործությունների չբացահայտված դեպքերին եւ տուժող կողմերի պնդումներին, թե գործերը փլվում են դատարանում, զինդատախազն ասաց, որ բոլոր գործերին էլ հետեւում է ու բոլոր գործերի վերաբերյալ ունի իր դիրքորոշումը. «Հանրությունը տեղյակ է բոլոր գործերով իմ դիրքորոշմանը, երբ հայտնել եմ: Այսօր առանձին որեւէ գործի, կրկնվեմ 48-րդ անգամ, չեմ անդրադառնում: Երբ ժամանակը գա, կհայտնեմ»:
Արփինե ՍԻՄՈՆՅԱՆ
