ԱԻՄ նախագահ Պարույր Հայրիկյանը նախընտրական քարոզարշավին «Հավատը՝ գործերով» կարգախոսով է ներկայանալու:
«Հավատն առ այն, որ Հայաստանը կարող է դառնալ ամենաժողովրդավարական երկիրը»,- այսօր «Սլաք» ակումբում ասաց պարոն Հայրիկյանը:
Պարոն Հայրիկյանը չի բացառում համագործակցությունը նախագահի թեկնածուների հետ. «Մի պայմանով՝ իմ ծրագրերի շուրջ, որովհետեւ իմ ծրագրերը բոլորի ծրագրերն են»:
Թեկնածուների հետ միավորումն էլ է պարոն Հայրիկյանի համար հնարավոր մի պայմանով.«Ընդդիմադիր դաշտում հայտնված լինելը ինձ բավական չէ՝ թեկնածուներին միավորելու կոչ անելու համար, մանավանդ, որ հիմնական թեկնածուները ժամանակին եղել են մեկ այլ միասնական թիմում, գործել իմ՝ այսինքն հայ ժողովրդի ինքնորոշման սկզբունքի դեմ: Կմիավորվեմ մի պայմանով, եթե թեկնածուները պատրաստ լինեն հանուն բարեփոխիչ ազդեցիկ ուժի ստեղծման համար զսպել իրենց հավակնությունները»:
Կարդացեք նաև
Սերժ Սարգսյանի մարդը լինելու իր վերաբերյալ տարածված լուրերը պարոն Հայրիկյանը պայմանավորեց մոր հուղարկավորության օրը ՀՀ նախագահի ուղարկած ծաղկեպսակով. «Ես բոլորի, շատերի մարդն եմ, բոլորին եմ ծառայել, այդպես էլ շարունակելու եմ ձգտելով լինել բոլորինը, նրանց բերել իմ արժեքային համակարգ, այսինքն՝ դեպի ժողովրդավարություն, անկախ Հայաստան, հարգանք մարդու նկատմամբ»:
Կբաժանե՞ն ընտրություններին ընտրակաշառք հարցին, նախագահի թեկնածուն պատասխանեց.« Եվրոպական միջամտությունը մեր քաղաքական կյանքին նպաստեց, որ ԱԺ ընտրություններին ունենանք խոսքի ազատություն, բայց Եվրոպայի վերահսկողությունը չնպաստեց, որ ազատվենք ընտրակաշառքից: Այն եղել է ու կլինի»:
Թե ովքեր են այս ընտրություններում կեղծ թեկնածուները կամ Սերժ Սարգսյանի մարդիկ, պարոն Հայրիկյանը կոռեկտ չհամարեց անդրադառնալ. «Ժամանակը ցույց կտա: Քաղաքականության մեջ բարձրագույն դիրքերին հավակնող մարդը պետք է քաղաքականության մեջ իրեն դրսեւորած լինի: Քաղաքական գործընթացներում պետք է լինեն քաղաքական գործիչները»:
Արփինե ՍԻՄՈՆՅԱՆ
