Այսօր լրագրողների հետ հանդիպման ժամանակ, ամփոփելով հունվարի 8-10-ը Հայաստանի խորհրդարանական պատվիրակության այցը Բրյուսել, պատվիրակության հանրապետական անդամ Արտակ Զաքարյանը անդրադարձավ նաեւ Հայաստան-Եվրասիական միություն փոխհարաբերություններին: Նրա կարծիքով, Հայաստանի եվրաինտեգրումը եւ Եվրասիական միության հետ հարաբերությունները որեւէ կերպ չեն կարող հակադրվել միմյանց, քանի որ դրանք տարբեր տեսանկյուններից բխում են Հայաստանի շահերից: Հանրապետական պատգամավորի կարծիքով՝ Հայաստանի եվրոպացի գործընկերները գիտակցում են, որ սուվերեն պետությունները պետք է քայլեր անեն իրենց շահերից ելնելով:
Հիշեցնենք սակայն, որ անցած տարեվերջին, երբ ակտիվացան ՀՀ-ի՝ Եվրասիական միության հետ հարաբերությունների մասին հայտարարությունները, եվրոպացի տարբեր բարձրաստիճան պաշտոնյաներ քննադատություն հնչեցրին Հայաստանի իշխանությունների հասցեին, որոնք գրեթե նմանվում էին կողմնորոշվելու պահանջի: «Մենք ԵՄ անդամ դառնալու հավակնություններ չունենք, հետեւաբար հակադրությունների խնդիր չկա: Եվրամիությունը մեզ համար լրացուցիչ անվտանգության եւ տնտեսական հարաբերությունների երաշխիք է, բայց դա որեւէ կերպ չի հակադրվելու ԱՊՀ շրջանակներում Հայաստանի համագործակցությանը, քանի որ Հայաստանի անվտանգության գլխավոր երաշխավորը մեր ռազմավարական գործընկեր Ռուսաստանն է: Իսկ Եվրասիական միության տնտեսական գրավչությանը Հայաստանն անտարբեր չի կարող լինել՝ ելնելով մեր երկրի շահից», կարծում է Արտակ Զաքարյանը:
Նելլի ԳՐԻԳՈՐՅԱՆ
