Տավուշի մարզպետ Արմեն Ղուլարյանը հիմք ընդունելով Սեւքարի միջնակարգ դպրոցի կառավարման խորհրդի 2012թ. դեկտեմբերի 28-ի որոշումը՝ հունվարի 14-ին Նաիրա Թանանյանին նշանակել է «Սեւքարի միջնակարգ դպրոց» պետական ոչ առեւտրային կազմակերպության գործադիր տնօրենի պաշտոնում եւ նրա հետ հինգ տարի ժամկետով կնքել աշխատանքային պայմանագիր:
Նույն օրը մեկ այլ որոշմամբ մարզպետ Ղուլարյանը Սեւքարի միջնակարգ դպրոցի գործադիր տնօրենի ժամանակավոր պաշտոնակատարի պաշտոնից ազատել է Մարուս Բալասանյանին եւ լուծել 2012թ. փետրվարի 1-ին նրա հետ կնքած աշխատանքային պայմանագիրը:
2012թ. դեկտեմբերի 28-ին Սեւքարի դպրոցում կայացել է տնօրենի թափուր պաշտոնի համար մրցույթ, թեկնածուն եղել է մեկը՝ Նաիրա Թանանյանը, ով ստացել է 5 «կողմ» եւ 1 «դեմ» ձայն:
«Առավոտը» նախկինում տեղեկացրել է, որ 2012 թ. նոյեմբերի 24-ին Սեւքարի դպրոցում կայացել է դպրոցի տնօրենի թափուր տեղի համար ընտրություն: Տնօրենի թեկնածու եղել է միայն Նաիրա Թանանյանը: Դպրոցի կառավարման խորհրդի 8 անդամներից քվեարկությանը մասնակցել է 6-ը, որից 4-ը քվեարկել է Նաիրա Թանանյանի օգտին, 2-ը՝ դեմ, տնօրեն ընտրվելու համար Ն. Թանանյանը պետք է առնվազն 5 քվե ստանար:
Կարդացեք նաև
Այդ օրը գյուղի երիտասարդությունը ավտոմեքենաներով ժամանել է դպրոցի բակ եւ դժգոհել, որ մարզպետ Ղուլարյանի ենթակայի թելադրանքով Սեւքարում դպրոցի տնօրեն են ընտրում: Նախկինում տեղեկացրել ենք, որ Սեւքարի դպրոցի քիմիայի ուսուցչուհի Ն. Թանանյանը մանկավարժական կրթություն չունի, նա ընդունվել է Իջեւանի քոլեջ, սույն կրթօջախի վերակազմավորման պատճառով կրթությունն ավարտել է ԵՊՀ Իջեւանի մասնաճյուղի «Բժշկական կիբեռնետիկա» մասնագիտությամբ:
Սեւքարի բնակիչներն «Առավոտի» թղթակցին ասացին, որ Նաիրա Թանանյանի ընտրությունը գյուղում միանշանակ չի ընդունվել:
Ի դեպ, Մարուս Բալասանյանի հետ աշխատանքային պայմանագիրը լուծելու մարզպետի որոշումը մարզպետարանի ինտերնետային կայքի «Իրավական ակտեր» բաժնի «Մարզպետի որոշումներ» խորագրի ներքո գլխիվայր, թարս է տեղադրվել:
Ոսկան ՍԱՐԳՍՅԱՆ
