ՀՀ երկրորդ նախագահ Ռոբերտ Քոչարյանը «Մեդիամաքս»-ին տված հարցազրույցում մի շարք հայտարարություններ է արել, մասնավորապես իր՝ նախագահական ընտրություններին չմասնակցության պատճառներից է համարել այն, որ իր համար «երկու ղարաբաղցիների պայքարն անընդունելի էր»:
Aravot.am-ը «Քաղաքական եւ միջազգային հետազոտությունների կենտրոնի» փորձագետ Ռուբեն Մեհրաբյանից հետաքրքրվեց՝ կարելի՞ է արդյոք երկրորդ նախագահի այս հարցազրույցը համարել ազդանշան, որ նա կմասնակցի 2018-ին կայանալիք նախագահական ընտրություններին: Մեր զրուցակիցը պատասխանեց. «Միանշանակ 2018-ի համար հայտ համարել, մի քիչ վաղաժամ կարելի է համարել: Համենայնդեպս, նրա ասածից կարելի է եզրակացնել, որ նա ամենեւին էլ իրեն ակտուալ քաղաքականությունից դուրս չի համարում: Իսկ մինչեւ 2018-ը դեռ ապրել է պետք»:
«Երկու ղարաբաղցիների» մրցակցության մասին հնչեցված դիրքորոշման առիթով էլ պարոն Մեհրաբյանը փոխանցեց հետեւյալը. «Եթե Սերժ Սարգսյանը ղարաբաղցի չլիներ, չնայած ղարաբաղցի էլ չի, Սյունիքի մարզի Տեղ գյուղից է, այլ լիներ ապարանցի, մենք պիտի Ռոբերտ Քոչարյան թեկնածո՞ւ ունենայինք: Դա ի՞նչ բացատրություն է: Դա ուղղակի վկայում է, թե ինչ գավառամիտ վերնախավ է գլխավորել ՀՀ-ն անցած տասը տարիներին: Ուղղակի ցավալի է: Այսինքն՝ ստացվում է, որ ինքը այդ սկզբունքո՞վ է առաջնորդվել ՀՀ-ն կառավարելիս: Այն սկզբունքով, որ ղարաբաղցիները չեն հակադրվում, մնացածը հակադրվում են: Դա ուղղակի ծայրահեղ գավառամտություն եմ համարում, որը պետականության ընկալումների հետ որեւէ կապ չունի: Դա հակապետական, հակազգային մտածելակերպ է: Այդպես մտածում են ոչ թե պետության մեջ, այլ գետտոյում»:
Քաղաքագետ Հրանտ Մելիք-Շահնազարյանը եւս անընդունելի է համարում ՀՀ տարբեր հատվածների բնակիչների միջեւ տարբերակում դնելը եւ կարծում է, որ ճիշտ չէ այդ գաղափարի շրջանակներում քաղաքականություն վարել: Մեզ հետ զրույցում նա նշեց. «Ռոբերտ Քոչարյանի ներկայացրած պատճառները նրա՝ ՀՀ նախագահական ընտրություններին չմասնակցելու հիմնական պատճառները չեն: Կարծում եմ՝ պատճառն ավելի անձնական ընկալումների դաշտում է: Բավական վաղ է խոսել 2018-ի մասին, քանի որ տեսնում ենք, որ քաղաքական իրավիճակը բավականին արագ է գործում ՀՀ-ում եւ հաշվարկել 2018-ին՝ ինչ պիտի լինի, այնքան էլ ճիշտ չի լինի: Մեսիջներ չեմ որոնում այս հարցազրույցի մեջ: Ակնհայտ է, որ Քոչարյանի սպասելիքները չարդարացան: Այս հարցազրույցը լուրջ քաղաքական քննարկումների թեմա դարձնելու ժամանակը չէ, քանի որ սպասվում են նախագահական ընտրություններ, եւ կարծում եմ, որ շարժիչ ուժը լինելու են հենց նախագահական ընտրությունները»:
Կարդացեք նաև
Տաթեւ ՀԱՐՈՒԹՅՈՒՆՅԱՆ
