Մամուլի տեղեկությունների համաձայն, վերջերս Գյումրիի նախկին քաղաքապետ Վարդան Ղուկասյանի որդին իրենց ընտանիքին պատկանող «Ալեքսանդրապոլ» հյուրանոցում ծեծել է «Հայռուսգազարդի» Գյումրիի մասնաճյուղի տնօրենին, որովհետեւ վերջինս պահանջել էր վճարել օգտագործած գազի դիմաց։
«ՉԻ» – Այս փաստը հերթական անգամ վկայում է, որ Հայաստանում բոլորը չէ, որ հավասար են օրենքի առաջ։ Համաձայնվեք՝ գազի տեսուչներին ծեծելու ցանկություն ունենում է ՀՀ ազգաբնակչության առնվազն 90 տոկոսը, եւ անհասկանալի է, թե ինչո՞ւ պիտի այդ բնական պահանջը բավարարելու արտոնություն ունենան միայն ընտրյալները։ Որտե՞ղ է արդարությունը։
Ի դեպ, եթե այս միջադեպն իսկապես տեղի է ունեցել, ապա պետք է արձանագրել, որ կյանքում առաջին անգամ Վարդան Ղուկասյանի որդին իրականացրել է գործողություններ, որոնք բխում են գյումրեցիների սրտից։ Այլ հարց է, որ գյումրեցիների հրճվանքը կիսատ-պռատ է։ Այ, եթե մասնաճյուղի տնօրենն էլ իր հերթին արժանի հակահարված հասցներ Ղուկասյանի որդուն, ազգաբնակչության ցնծությունը կատարյալ կլիներ։
«Չորրորդ ինքնիշխանություն»
