«Նախորդ տարվա ընթացքում Ղարաբաղի հարցում Ադրբեջանը շարունակում էր վարել իր ներկայիս ղեկավարի որդեգրած քաղաքականությունը, մասնավորապես` ագրեսիվ հռետորաբանություն եւ սահմանի վրա լարվածության միտումնավոր ուժգնացում»,-այսօր «Փաստարկ» ակումբում ասաց ՀՀ ԳԱԱ Արեւելագիտության ինստիտուտի տնօրեն, թուրքագետ Ռուբեն Սաֆրաստյանը:
Նրա կարծիքով` Ադրբեջանի կողմից հարձակման շուրջ մտավախությունները հիմնավորված են. «Սակայն Ադրբեջանն իր ագրեսիվ նկրտումները կփորձի իրականություն դարձնել այն դեպքում, երբ Իրանի դեմ Արեւմուտքի կողմից ռազմական գործողություններ տեղի ունենան: Այդ առումով 2013-ը պետք է լինի մեր դիվանագիտության ակտիվացման տարի, մասնավորապես` բանակցային գործընթացում պետք է նոր առաջարկներ ի հայտ բերել, ակտիվ լինել մեր դաշնակիցների` Ռուսաստանի, ԱՄՆ-ի եւ եվրոպական երկրների հետ հարաբերություններում: Այն վտանգը, որը զգում ենք Ադրբեջանից, պետք է փոխանցենք նաեւ մեր դաշնակիցներին: Գուցե նրանք լավ չեն հասկանում, թե ինչ է կատարվում Ադրբեջանում: Վերջինիս ինֆորմացիոն վտանգը չեզոքացնելուց բացի, որպես ռազմական հենարան պետք է դիտարկենք ՀԱՊԿ-ը»:
Սաֆրաստյանի խոսքով. «Ադրբեջանում սպասվելիք նախագահական ընտրությունների շեմին կակտիվանա պատերազմի պրոպագանդան: Սահմանամերձ շրջաններում պրովոկացիաներ տեղի կունենան, որպեսզի ապահովեն Ալիեւի եւ նրա քաղաքական ուժի շուրջ ժողովրդի համախմբվածությունը: Հետեւաբար, Ադրբեջանի վարած քաղաքականության տեսանկյունից տարին մեզ համար ակտիվ կլինի»: Խոսելով Սիրիայի կոնֆլիկտից` թուրքագետն ասաց, որ երկրի իշխանությունները իրավիճակը կկարգավորեն այն ժամանակ, երբ դադարի դրսից եկող օժանդակությունը ապստամբներին:
Դիտարկելով Վրաստանում տեղի ունեցած ընտրությունները, Ռուբեն Սաֆրաստյանը նշեց, որ վերջիններս մի քանի կարեւոր եզրահանգման են բերել. «Այն քաղաքական ուժը, որն իր քաղաքականությունը կառուցում է իրադրությունը ոչ իրապես գնահատելով եւ երկրի ներսում ու դրանից դուրս եղած մանիպուլյացիայի միջոցներ օգտագործելով, չի կարող գոյատեւել որպես կառավարող ուժ: Իշխանափոխությունն ապացուցեց, որ վերոհիշյալ քաղաքականությունը սխալ է: Կարծում եմ` այս տարի կտեսնենք նոր Վրաստան, որն առավել իրական հիմքերի վրա կկառուցի իր քաղաքականությունը»:
Կարդացեք նաև
Լուիզա ՍՈՒՔԻԱՍՅԱՆ
