Բանից պարզվում է՝ Երեւանի ատամնաբուժարաններն այսուհետ նոր հարկ պիտի վճարեն։ Նոր կարգի համաձայն, ատամնաբուժարաններն այսուհետ բոլոր «սովորական» հարկերից բացի պիտի նաեւ ամեն աթոռի համար ամսական 60-100 հազար դրամ հարկ վճարեն։
«ՉԻ»- Սա իսկապես շատ առողջ մոտեցում է։ Ակնհայտ է, որ ինչպիսին էլ լինեն հետեւանքները՝ Հայաստանը դրանից միայն շահելու է։ Նախ՝ ատամնաբուժարանները սրանից հետո պարզապես աթոռներ չեն պահի, եւ այցելուները կսպասարկվեն կանգնած վիճակում, ինչն արդեն իսկ էական առաջընթաց է (չեք հավատում՝ յոգերին հարցրեք): Երկրորդ՝ եթե անգամ այս նորամուծության արդյունքում ատամնաբուժարանների այցելուների թիվը նվազի, դա նույնպես կունենա իր դրական հետեւանքները։ Մարդիկ ատամներ չեն ունենա, այսինքն՝ ավելի դժվարությամբ կսնվեն, ինչն էլ իր հերթին բարեբաստիկ ազդեցություն կունենա Հայաստանի արտաքին առեւտրի հաշվեկշռի վրա, որովհետեւ Հայաստանում սպառվող սննդամթերքի մեծ մասը ներմուծվում է։ Նվազում են ատամները՝ նվազում է ներմուծումը։ Այնպես որ՝ երկրի տնտեսության առողջացման բանաձեւը գտնված է:
«Չորրորդ ինքնիշխանություն»
