Ինքնաբացարկի դիմած նախկին կոմունիստ եւ իրեն սոցիալիստ համարող նախագահի թեկնածու Ռոբերտ Ահարոնյանը, ինչպես ինքն է ասում, ընտրապայքարից հեռանում է պատվով ու հաղթանակով:
«Այս պետությունում պայքարել Հանրապետական կուսակցության դեմ՝ պրակտիչեսկի հնարավոր չէ: ՀՀԿ-ն , իրենց կուսակցության ղեկավարը գաղափարապես կրել են պարտություն: Հիմա մեր գաղափարապես հաղթանակը ընտրություններից հետո ցույց կտանք ու կապացուցենք, որ ամեն ինչ գումարով, փողով չէ »,-Aravot.am-ին ասաց պարոն Ահարոնյանը:
Ըստ նրա, ինքնաբացարկի է գնացել՝ անհավասար ընտրություններին չմասնակցելու համար:
Նրանից հետաքրքրվեցինք՝ իսկ ժողովուրդը ընտրագրավի համար իր բացած հաշվեհամարում գումար փոխանցե՞ց: Հիշեցնենք, նա ավելի վաղ մեզ հետ զրույցում ասել էր, որ հատուկ հաշվեհամար է բացելու, որ 8 միլիոն դրամ ընտրական գրավը հավաքագրելու գործում ժողովուրդը մասնակցի:
Կարդացեք նաև
«Գումարները փոխանցվել են: Մենք պադաչյոտ ենք մեր ժողովրդի, փոխանցողների, որովհետեւ խնդրել ենք՝ անուն- ազգանուններով լինի, որ հետագայում իմանանք ՝ ովքեր են փոխանցել: 32.000 դոլարի չափով գումար ունենք, մեր բյուջեի վրա է նստած: Մեր վերստուգիչ հանձնաժողովը նայում է, քննում է, ու այդ ամբողջ գործունեությունը պետք է ծավալենք ու պատրաստվենք հաջորդ ընտրություններին՝ տեղական ինքնակառավարման, Ազգային ժողովի… գործընթացը սկսվեց»:
Մեր հարցին, թե առաջադրվելուց առաջ հաշվի չէ՞ր առել, որ ՀՀԿ-ն չի արձագանքի իր առաջարկին, նա պատասխանեց՝ համոզված էր, որ ՀՀԿ-ն կուզենա հաղթել, բայց հիմա ՀՀԿ-ն, ըստ նրա, հաղթում է միայն գումարով, «Հետաքրքիր կլիներ, որ հաջորդ ընտրություններին լսեինք, որ քվեարկողն էլ պետք է գրավ մուծի, որ կարողանա մասնակցել ընտրություններին, օրինակ՝ ընտրողի մասնակցության համար՝ 100.000 դրամ»:
Նրանից նաեւ հետաքրքրվեցինք, իսկ ՀՀԿ-ի հետ հեշտ կլինի՞ պայքարել հաջորդ ընտրություններին. «ՀՀԿ-ն հաջորդ ընտրություններին չի կարող լինել, չի մասնակցելու ընդհանրապես: Համոզված եմ՝ ՀՀԿ-ի իշխանությունը մի երկու տարվա ընթացքում արդեն կսահմանափակվի… կապրենք, կտեսնենք»:
Արփինե ՍԻՄՈՆՅԱՆ
