Այսօր ՀՀ էկոնոմիկայի նախարարությունում կայացած Արդյունաբերության զարգացման հիմնադրամի հոգաբարձուների առաջին նիստի ժամանակ քննարկվեց 2013 թվականի պետական աջակցության միջոցառումների ծրագիրը, ինչպես նաեւ ձեւավորվեց խորհրդի ժամանակավոր կազմը:
Ինչպես լրագրողների հետ հանդիպման ընթացքում նշեց ՀՀ էկոնոմիկայի նախարար Տիգրան Դավթյանը՝ Արդյունաբերության զարգացման հիմնադրամի ստեղծման նպատակն է արդյունաբերության աջակցումը՝ ինովացիոն ծրագրերի եւ արդյունաբերության զարգացմանն ուղղված քայլերի իրականացումն ու համակարգումը, պետություն-մասնավոր հատված երկխոսության եւ համագործակցության խթանումը։
Գյումրու տնտեսական զարգացման հիմնադրամի հիմքի վրա ձեւավորված նոր հիմնադրամը կունենա շուրջ 500 մլն դրամի ֆինանսական ներուժ:
Էկոնոմիկայի նախարարի հավաստմամբ` 2012 թ.-ին արդյունաբերական կազմակերպությունների կողմից թողարկած արտադրանքի ծավալը կազմել է շուրջ 10%, իսկ 2013 թ.-ին պետական բյուջեի հիմքում դրված արդյունաբերության արժեքի աճը կկազմի շուրջ 9.2%:
«2012 թվականին արդյունաբերական արտադրանքի ծավալը անկախությունից հետո առաջին անգամ հասել է 1 տրիլիոն դրամի սահմանին: 500 մլն դրամը, անշուշտ, բավարար գումար չէ արդյունաբերությանը վերաբերող խնդիրները լուծելու համար, բայց այս պահին սա է մեր հնարավորությունը: Ժամանակի ընթացքում կփորձենք նաեւ ներգրավել միջազգային եւ մասնավոր կազմակերպություններին»,- ասաց էկոնոմիկայի նախարարը` ընդգծելով, որ իրենք կփորձեն պահպանել Գյումրու տնտեսական զարգացման հիմնադրամի առողջ ու կառուցողական կողմերը:
ՀՀ էկոնոմիկայի նախարար Տիգրան Դավթյանի հավաստմամբ` հիմնադրամի գործունեության շրջանակներում շուտով կգործարկվեն երկու հզոր արդյունաբերական ընկերություններ, որոնցից մեկը զբաղվում է սեւ մետաղի մշակմամբ, մյուսը` կրիստալների աճեցմամբ:
Հիշեցնենք, որ Արդյունաբերության զարգացման հիմնադրամի հոգաբարձուների խորհուրդը կազմված է պետական եւ հասարակական հատվածների ներկայացուցիչներից: Մասնավոր հատվածը ներկայացված կլինի ռոտացիոն սկզբունքով` երկու տարին մեկ անգամ փոփոխվելով, իսկ պետական հատվածն` ի պաշտոնե:
Աշոտ Աթայան
