«Հենարան» ակումբում այսօր Ադրբեջանահայերի ասամբլեայի նախագահ, ադրբեջանագետ Գրիգորի Այվազյանն իր դիտարկումները ներկայացրեց 1990թ հունվարին Բաքվում հայերի ջարդի եւ դրա միջազգային ճանաչման խնդրի շուրջ:
«Կատարվածից կարելի է դաս քաղել, որ միայն ազատ եւ հզոր Հայաստանն է հայի ապահով կյանքի եւ անվտանգության երաշխիքը: Ադրբեջանցի թուրքերը եւ Արցախի հայերը չեն կարող մեկ պետության սահմաններում խաղաղ ապրել: Ադրբեջանցի թուրքերը համաձակ են միայն այն ժամանակ, երբ 400 հոգով հարձակվում են հայի տան վրա կամ կացնահարում քնած մարդուն»,-ասաց Գրիգորի Այվազյանը:
Նրա խոսքով. «Ադրբեջանահայերը, որպես ջարդերի ականատեսներ եւ վերապրածներ, առաջնահերթ պետք է պահանջատիրություն ցուցաբերեն եւ աշխարհին ներկայացնեն ճշմարտությունը Բաքվի ջարդերի եւ դրանց նախորդած՝ 1988թ-ի Սումգայիթյան կոտորածների մասին: Մենք պարտավորություն ունենք անմեղ հայ նահատակների հիշատակի առջեւ, որովհետեւ նրանք սպանվեցին միայն հայ լինելու պատճառով: Իսկ ողջ հայ ժողովրդի առջեւ խնդիր պետք է դնենք՝ թույլ չտալ կատարված հանցանքի կրկնություն ՝ հանուն Հայաստանի եւ Արցախի բնակչության անվտանգության»:
Խնդրին լուծում տալու համար ադրբեջանագետն առաջարկում է ակտիվ հանդիպումներ կազմակերպել բոլոր շահագրգիռ կողմերի, այդ թվում՝ ԶԼՄ-ների եւ միջազգային կառույցների ներկայացուցիչների հետ: «Անհրաժեշտություն կա այցելել հայկական գաղթօջախներ եւ համապատասխան քարոզչական աշխատանք տանել, բացի այդ՝ բարձրացնել ՀՀ ԱԺ-ում ադրբեջանահայերի ցեղասպանության պաշտոնական ճանաչման վերաբերյալ օրինագծի վերստին շրջանառության մեջ դնելու հարցը»,-հավելեց Այվազյանը:
Կարդացեք նաև
Լուիզա ՍՈՒՔԻԱՍՅԱՆ
