Այսօր՝ ժամը 13-ին հրավիրված արտահերթ նիստում Կենտրոնական ընտրական հանձնաժողովը քննարկելու է փետրվարի 18-ի Հանրապետության Նախագահի ընտրություններին թեկնածուներին գրանցելու մասին դիմումները:
Ընտրական օրենսգրքի համաձայն, Հանրապետության Նախագահի թեկնածուն գրանցվում է առանց քվեարկության, եթե նրա գրանցման վերաբերյալ հանձնաժողովի անդամներն առարկություն չեն ներկայացրել:
Հանրապետության Նախագահի թեկնածուի գրանցումը ԿԸՀ-ն մերժում է, եթե նա չունի ընտրվելու իրավունք, կամ եթե գրանցման համար ներկայացված փաստաթղթերը թերի են կամ կեղծված:
Հանրապետության Նախագահի թեկնածուի գրանցման վերաբերյալ ԿԸՀ-ի անդամի առարկության դեպքում առարկությունը դրվում է քվեարկության: Գրանցումը մերժվում է հանձնաժողովի անդամների ընդհանուր թվի ձայների առնվազն երկու երրորդով:
Կարդացեք նաև
Նախագահի թեկնածուի գրանցումը մերժելու, գրանցումն անվավեր ճանաչելու մասին ԿԸՀ-ի որոշումը կարող է բողոքարկվել ՀՀ վարչական դատարան` ՀՀ վարչական դատավարության օրենսգրքով սահմանված կարգով և ժամկետներում: ԿԸՀ-ի որոշումն անվավեր ճանաչելու մասին դատարանի վճռով թեկնածուն համարվում է գրանցված կամ վերագրանցված:
