Ծաղկաձոր-Հանքավան խաչմերուկում «Հրազ ՋԷԿ» բաց բաժնետիրական ընկերությունը ՀՀ նախագահի աթոռի համար պայքարող 8 թեկնածուներին իրենց նախընտրական գովազդային պաստառը տեղադրելու համար առաջարկում է վահանակ` 18 քմ տարածքով: «Հրազ ՋԷԿ» -ի ծառայությունը մեկ ամսվա համար արժե 11 250 դրամ: Այս մասին տեղեկանում ենք Կենտրոնական ընտրական հանձնաժողովի (ԿԸՀ) կայքէջից:
ԿԸՀ-ն հրապարակել է այն տնտեսվարողների ցանկը եւ նրանց պատկանող գովազդային վահանակների գտնվելու վայրի հասցեն, որոնք նախընտրական շրջանում մեծադիր նախընտրական պաստառի համար իրենց ծառայություններն են առաջարկում թեկնածուներին: Գովազդի գները մեկ քմ-ի համար սկսվում է 2000 դրամից:
Այս գործում, այսպես ասած, գերիշխողը 4 ընկերություններ են`
«Յունիքորն գրուպ» ընկերությունը, «ԷԳԱ» ՍՊԸ-ն, Գյումրիում գրանցված «Իմիջ Մ. Գ.» ՍՊԸ-ն, «Նուշիկյան ասոցիացիա»-ն: Այս ընկերությունը նախագահի թեկնածուներին միայն մայրաքաղաքի վարչական շրջաններն է առաջարկում:
Կարդացեք նաև
Առաջին 3 ընկերությունները, բացի քաղաքային վայրերից, ծառայություն են մատուցում նաեւ միջպետական եւ միջհամայնքային ճանապարհներին:
«Յունիքորն գրուպ»-ին պատկանում է 104 վահանակ, մայրաքաղաքի կենտրոնական փողոցներում տեղադրված վահանակներին գովազդ պատվիրելու համար թեկնածուն պետք է 1 քմ-ի համար վճարի 11 հազար դրամ: Միջպետական ճանապարհներին գովազդի գները գրեթե կրկնակի նվազում են. օրինակ` Երեւան-Գյումրի ավտոճանապարհին 1 քմ-ն արժե 4320 դրամ: Երեւան-Երասխ-Գորիս-Մեղրի ճանապարհին թեկնածուների համար նախատեսված գովազդի 1 քմ-ի արժեքը նույնն է:
«ԷԳԱ» ՍՊԸ-ն Աշտարակի խճուղում իր ծառայությունների արժեքը գնահատում է 162 հազար դրամ` նախագահի թեկնածուին մեկ ամիս շարունակ ցուցադրելու համար: Այս դեպքում գովազդային ընկերությունն առաջարկում է 27 քմ տարածք:
Մալաթիա-Սեբաստիայում «ԷԳԱ»-ն մեկ ամսվա համար 18 քմ-ով տարածք է վաճառում` 108 հազար դրամով:
Վահանակների բիզնեսով զբաղվող «Իմիջ Մ. Գ.» ընկերությունը Գյումրի քաղաքի, Երեւանյան խճուղում երկկողմանի պաստառը նախագահի թեկնածուներին առաջարկում է 97 հազար 200 դրամով, Երեւան-օդանավակայան ճանապարհին` 108 հազար դրամով:
Դավիթաշենում, այս ընկերությունը 90 քմ տարածքը տրամադրում է 540 հազար դրամով, ընդ որում, «Իմիջ Մ. Գ.»-ն միակողմանի պաստառի համար է այդքան գին սահմանել:
ԿԸՀ-ի կայքում գովազդի ծառայություն են մատուցում նաեւ անհատ ձեռներեցներ: «Արամ Դանիելյան» Ա/Ձ-ն Երեւան-Մեղրի միջպետական մայրուղու վրա տեղադրված վահանակին 18 քմ-անոց տարածքը վաճառում է 1 քմ-ն 6 հազար դրամով:
«Դավիթ Մելիքյան» Ա/Ձ-ն Կապան-Երեւան-Գորիս-Մեղրի միջպետական ճանապարհին, 22,5 քմ տարածքով վահանակի վրա նախագահի թեկնածուի մեծադիր լուսանկարը մեկ ամիս շարունակ ցուցադրելու համար պահանջում է 100 հազար դրամ:
Լուսինե ԲՈՒԴԱՂՅԱՆ
