Այսօր ՀԱՍԿ (Հայաստանի աշխատավորական սոցիալիստական կուսակցություն) նախագահ Մովսես Շահվերդյանը լրագրողների հետ հանդիպման ժամանակ անդրադարձավ երկրում տիրող, ինչպես նաեւ առաջիկայում կայանալիք նախագահական ընտրություններում ստեղծվող իրավիճակին:
Շահվերդյանը, ներկայացնելով ՀԱՍԿ-ի անցած ուղին, նշեց, որ այն մասնակցել է բոլոր նախագահական ընտրություններին, ինքը եղել է նախագահի թեկնածու Սոս Սարգսյանի վստահված անձը, 1996 թվականին պաշտպանել են ընդդիմության միասնական թեկնածու Վազգեն Մանուկյանին, 1998 թվականին՝ սատարել Կարեն Դեմիրճյանին, 2008 թվականին՝ սատարել Լեւոն Տեր-Պետրոսյանին, իսկ այժմ՝ Րաֆֆի Հովհաննիսյանին:
Շահվերդյանի համոզմամբ՝ «2013 թվականի նախագահական ընտրությունները շատ հետաքրքիր եւ անսպասելի են լինելու»: Նրա խոսքով՝ «1998 թվականին, երբ Կարեն Դեմիրճյանն առաջադրվեց, ոչ մի վերլուծաբան չէր կանխատեսում, ոչ մեկը չէր ասում, որ հնարավոր է նրա վերադարձը մեծ քաղաքական դաշտ, բայց ինչպես տեսնում եք՝ եղավ անկանխատեսելին, նույնը սպասեք նաեւ այս ընտրություններում: Չի լինելու այն, ինչ բոլորը կանխատեսում են: Հայաստանը դատարկվում է, իսկ մենք թույլ չենք տա, որ մի քանի ստահակներ, բաշիբոզուկներ ապականեն հայրենիքը: Այսօրվա իշխանությունները ի վիճակի չեն երկրում արդար ու արդյունավետ քաղաքականություն իրականացնել»:
Շահվերդյանը նաեւ հավելեց, որ այսօր նախագահի աթոռի համար պայքարող նշաձողն այնքան է իջել, որ տասնյակ մարդիկ կարող են մասնակցել նախագահական ընտրություններին, մինչդեռ. «Ընտրություններն առիթ պետք է լինեն իշխանափոխության համար»:
Կարդացեք նաև
Իսկ գործող նախագահ Սերժ Սարգսյանի մրցակից, ըստ Շահվերդյանի, կարող է լինել միայն Րաֆֆի Հովհաննիսյանը:
Եվա ՀԱԿՈԲՅԱՆ
