«Ահարոն Ադիբեկյանը աշխատում է ժողովրդին բարոյալքելու, Հայաստանը բռնապետական երկիր ներկայացնելու ուղղությամբ: Նա ընդառաջ է գնում իշխանություններին, դրանով արջի ծառայություն մատուցելով նրանց»,- այսօր «Փաստարկ» ակումբում հայտարարեց ԱԻՄ առաջնորդ, նախագահի թեկնածու Պարույր Հայրիկյանը:
Բանախոսի ձեւակերպմամբ՝ Ադիբեկյանի հարցումները հակագիտական են, քանի որ ոչ մի երկրում, նախագահի թեկնածուն ժողովրդավարության պայմաններում, ոչ մի դեպքում չի կարող ունենալ 40 տոկոսից ավելի ձայն. «70 տոկոսանոց արդյունքներ նա կարող է ստանալ, միայն հանրապետականներին ձայն տված մարդկանց շրջանակներում հարցում անցկացնելու միջոցով»:
Հայրիկյանը նաեւ նշեց, որ մոտ երկու շաբաթ առաջ ինքն Ադիբեկյանի հարցումներում տեղ չի զբաղեցրել, ապա կամաց-կամաց իր անունն էլ է շրջանառության մեջ դրել, այժմ՝ խոսում է տոկոսների մասին:
Անդրադառնալով նախագահական ընտրություններին, մասնավորապես մեկ այլ թեկնածու Անդրեաս Ղուկասյանի հայտարարությանը, թե ընտրությունները պետք է բոյկոտել, Հայրիկյանը հակառակ կարծքին է: Ըստ նրա՝ բոյկոտել ընտրությունները, կնշանակի աջակցել Սերժ Սարգսյանին, մինչդեռ Հայրիկյանը, իր խոսքով ասած՝ «նման խաղերում չկա»: Բացի այդ՝
«Դա էր պակաս, որ ինչ-որ նորելուկ ինձ ասի, թե ես ինչ անեմ: Կամ ասում է՝ ով չի միանում, սատարում է Սերժ Սարգսյանին: Ինձ մի ստիպեք, որ ասեմ, թե ով է աջակցում Սերժ Սարգսյանին»:
Եվա ՀԱԿՈԲՅԱՆ
