«Մարդու առողջության վրա ազդում են մի շարք գործոններ` կենսապայմանները, ծխախոտը, ալկոհոլը, թմրանյութը, գեները, որոնք ծնողից անցնելով երեխային` վերջինիս մոտ հակումներ են դրսեւորում որոշ հիվանդությունների հանդեպ, ինչպես նաեւ` եղանակային պայմանները, օդի եւ ջրի աղտոտվածությունը, տիեզերական ճառագայթները, որոնք ազդում են մարդու օրգանիզմի վրա,-այսօր «Տեսակետ» ակումբում ասաց կենսաբանական գիտությունների թեկնածու, դոցենտ Ռուզաննա Ղազարյանը, ապա հավելեց,-կարեւոր է նաեւ հանրային առողջապահությունը, որի ներկայացուցիչները հաճախ անբարեխիղճ են աշխատում. օրինակ՝ ուշանում է շտապօգնությունը»:
Տիկին Ղազարյանը նշեց, որ առողջության պահպանման համար կարեւոր է շարժունակությունը. «Մարդը շարժման մեջ է` ծնված օրից մինչ խոր ծերություն: Երեւանցի մի կնոջ գիտեմ, ով միշտ աշխատել է եւ ակտիվ շարժման մեջ գտնվել, չնայած` ծխելը թողել է հինգ տարի առաջ: Նա բավական լավ վիճակում է, ինչը պայմանավորված է շարժունակությամբ»:
Մասնագետի խոսքով. «Ներկայիս վիճակագրական տվյալների համաձայն` Հայաստանի բնակչության շուրջ 70 տոկոսը չի զբաղվում ֆիզկուլտուրայով, հատկապես` 11-17 տարեկանները: Իսկ ուսանողների շուրջ 90 տոկոսը չունի լիարժեք ֆիզիկական ակտիվություն: Ֆիզիկական պասիվությունից առաջանում է հիպոդինամիա, որը հանգեցնում է մկանների եւ ոսկրերի ապաճմանը: Հատկապես նստակյաց կյանք վարողները պետք է հետեւեն իրենց քաշի կարգավորմանը եւ օգտագործեն ռացիոնալ սնունդ: Պետք է խուսափել նաեւ տեւական սթրեսներից, որոնք հյուծում եւ «շարքից դուրս են բերում» մարդուն»:
Լուիզա ՍՈՒՔԻԱՍՅԱՆ
Կարդացեք նաև
