Aravot.am-ը մի նամակ է ստացել «Ավան համայնքի բնակիչներ» ստորագրությամբ, որտեղ ահազանգ կա Ավան թաղամասի Թամրուչի-36 հասցեում գործող Մխիթարյան կրթահամալիրի վերաբերյալ, որը հովանավորվում է Մխիթարյան միաբանության կողմից: Նամակում տարբեր մեղադրանքների շարքում մասնավորապես նշված է, թե այնտեղ դասավանդում է մանկավարժի որակավորում չունեցող անձ, իսկ տնօրեն Սերովբե վարդապետ Չամուրլյանը (լուսանկարում) տերթոդիկյան մեթոդով է աշխատում:
ԿԳ նախարարության լիցենզավորման գործակալության պետ Մովսես Մովսիսյանն Aravot.am-ին փոխանցեց, որ ԿԳ նախարարությունն էլ էր տարեվերջին նման բողոք ստացել եւ նախարարի հրամանով ստեղծվել էր 3 հոգուց բաղկացած հանձնաժողով: «Մարդիկ գնացին տեղում պայմաններն ու պահանջներն ուսումնասիրեցին: Ուսումնասիրության արդյունքներով կազմվել է տեղեկանք, որտեղ նշված է, թե չկան այնպիսի խիստ թերություններ, ինչպես բողոքում են: Ցանկացած դպրոցում էլ կարող է մի բան այն չլինել, բայց դա լիցենզիայի պայմանի պահանջի խախտում չէ: Դա մասնավոր, ինքնաֆինանսավորվող, նույնիսկ բարեգործական հաստատություն է, որտեղ ուսուցումն անվճար է, կրթօջախն իր համար ուսուցում է կազմակերպում՝ նախարարության կողմից հաստատված կարգերի, օրենքի չափորոշիչներին համապատասխան, թե այնտեղ ներսում ի՞նչ բարքեր կան, մեր խնդիրը չէ: Օրինակ, չենք կարող գիշերով գնալ-ստուգել, երեխաները քնո՞ւմ են, թե՞ այլ բանով են զբաղված, կրկնում եմ՝ ծրագրեր, դասացուցակ, աշակերտների շարժ, մանկավարժական կազմ, դասարաններ… ամեն ինչ նորմալ վիճակում է: Իսկ եթե ծնողները դժգոհ են, կարող են իրենց երեխաներին այլ դպրոց տանել»,-ասաց նախարարության ներկայացուցիչը:
Հավելենք, որ խնդրին ԿԳ նախարար Արմեն Աշոտյանն էլ է անդրադարձել իր Ֆեյսբուքյան էջում, խոստանալով մանրամասներ հրապարակել երեկոյան, տեղեկացնելով, որ հետաքրքիր բաներ են բացահայտվում:
Գոհար ՀԱԿՈԲՅԱՆ
