Հունվարի 14-ին «Արամ Խաչատրյան» համերգասրահում Հայաստանի պետական երիտասարդական նվագախումբը այս տարվա ընթացքում առաջին անգամ հանդես կգա համերգային ծրագրով` իտալացի աշխարհահռչակ ակորդեոնահար, բանդոնեոնահար Մարիո Ստեֆանո Պիետրոդարկիի հետ: Այս մասին այսօր «Նովոստի» միջազգային մամուլի կենտրոնում ասաց Հայաստանի պետական երիտասարդական նվագախմբի գեղարվեստական ղեկավար եւ գլխավոր դիրիժոր Սերգեյ Սմբատյանը: Նա նշեց, որ համերգի ընթացքում կներկայացվի մեկ համաշխարհային պրեմիերա, իսկ ծրագիրն ընդհանուր առմամբ լինելու է թեթեւ եւ հետաքրքիր. «Կներկայացնենք սիրված ստեղծագործություններ Ռոբերտո Մոլինելիից, Աստոր Պիացոլայից, Ֆաբիո Կոնչիելայից: Գեղարվեստական տարին սկսել ենք էմոցիոնալ նոտայով եւ այդպես կշարունակենք»:
Մարիո Ստեֆանո Պիետրոդարկին նշեց, որ կարեւորում է համերգը նվագախմբի եւ շփումը հայ երաժիշտների հետ. «Բավական լավ կարծիք ունեմ նվագախմբի երաժիշտների եւ կազմակերպչական ունակությունների մասին: Մեր ծրագիրը ներառում է բավական հետաքրքիր գործեր, որոնց մեծ մասը հայ հանդիսատեսն առաջին անգամ է լսելու»: Պիետրոդարկին հավելեց, որ առհասարակ հագեցած գրաֆիկ ունի, բայց սիրով եկել է Հայաստան, իսկ համերգից հետո կմեկնի Համբուրգ, այնուհետեւ` Իտալիա:
Աշխարհահռչակ ակորդեոնահարը նաեւ ասաց, որ առաջին անգամ Հայաստան է եկել Տոնինո Գուերայի շնորհիվ. «Նա մեզ հետ չէ, բայց ես զգում եմ նրա ներկայությունը եւ պարտական եմ նրան, որ հնարավորություն տվեց զգալ Հայաստանի շունչը: Գուերան մեր կողքին է. Հայաստանի հետ իմ կոնտակտը խոսում է այն մասին, որ ես միշտ կհիշեմ նրան»:
Լուիզա ՍՈՒՔԻԱՍՅԱՆ
