Իջեւան քաղաքի բնակիչ, 1965 թ. ծնված Սայադ Սարգսյանին մեղադրանք է առաջադրված այն բանի համար, որ նա աշխատելով ՀՀ ոստիկանության Իջևանի բաժնի պետի տեղակալ, անձնական այլ շահագրգռությունից ելնելով, իր պաշտոնեական դիրքն օգտագործել է ծառայության շահերին հակառակ և չի կատարել ծառայողական պարտականությունները, որն էական վնաս է պատճառել պետության և անձանց իրավունքներին և օրինական շահերին:
Ոստիկանության բաժնի պետի նախկին տեղակալի նկատմամբ խափանման միջոց է ընտրվել չհեռանալու մասին ստորագրությունը: Նրան մեղադրանք է առաջադրված ՀՀ քրեական օրենսգրքի 308 հոդվածի 1-ին մասով («Պաշտոնական լիազորությունները չարաշահելը»): Սույն հոդվածը նախատեսում է տուգանք՝ նվազագույն աշխատավարձի երկուհարյուրապատիկից երեքհարյուրապատիկի չափով, կամ որոշակի պաշտոններ զբաղեցնելու կամ որոշակի գործունեությամբ զբաղվելու իրավունքից զրկելով՝ առավելագույնը 5 տարի ժամկետով, կամ կալանքով 2-3 ամիս ժամկետով կամ ազատազրկմամբ՝ առավելագույնը 4 տարի ժամկետով:
Տավուշի մարզի առաջին ատյանի դատարանում սույն գործով դատական առաջին նիստը նշանակված է հունվարի 16-ին:
Ոսկան ՍԱՐԳՍՅԱՆ
