«Ազգային համաձայնություն» կուսակցության նախագահ, ՀՀ նախագահի թեկնածու Արամ Հարությունյանի խոսքով՝ նայելով ԱԺ ընտրությունների արդյունքները, անհասկանալի է դառնում մի բան, թե ինչպես եղավ, որ շատ ձայներ ստացած կուսակցությունները չմասնակցեցին նախագահական ընտրություններին. «Օրինակ Գագիկ Ծառուկյանն ասում էր՝ ես պատրաստ եմ կորցնել ամեն ինչ, համոզված եմ, նկատի ուներ հարստությունը եւ այլն, եւ եթե նա չառաջադրվեց, նշանակում է միայն մի բան պատրաստ չէր կորցնել, եւ նրանից հենց այդ բանն են ուզել, իսկ դա այն է, ինչ տրված է Աստծո կողմից»:
Հարությունյանի համար այս ընտրությունները նախորդից այնքանով է տարբերվում, որ, ըստ նրա՝ կեղծ ժողովրդավարներ ու կեղծ նախագահի թեկնածուներ չկան. «Այսօր նախագահի նախկին թեկնածուները Հանրապետականի հողամասերում կամ պադվալներով վարձով են մնում»:
ՀՀ նախագահի թեկնածուն կարծում է, որ այսօր իշխանությունները զբաղված են միայն փող աշխատելով, անգամ սիրիահայերի հետ կապված. «Նրանց 20 հազար դրամանոց կտրոններ են տալիս, որ օգտվեն միայն «Լֆիկ Սամոյի» խանութներից, որին ավանդույթի համաձայն, պաշտպանում է Հանրապետական կուսակցությունը»:
Եվա ՀԱԿՈԲՅԱՆ
