«Ինձ համար զարմանալի է, թե ինչու խորհրդարանական ընտրություններին
բավականին ձայներ հավաքած կուսակցությունները չմասնակցեցին ընտրություններին: Չկար մի պատճառ, որ Գագիկ Ծառուկյանը չառաջադրվեր: Առաջարկում եմ նախագահի բոլոր թեկնածուներին, բացի Սերժ Սարգսյանից, հանել իրենց թեկնածությունը եւ համոզված եմ, որ նա չի ստանա ձայների 50 տոկոսը, քանի որ երկրի վիճակը շատ ավելի վատ է, արտագաղթը՝ մեծ: Նրան մենակ թողնելով, մենք կհասկանանք իրական պատկերը՝ առանց կեղծիքների»,- այսօր «Հայացք» ակումբում ասաց «Ազգային համաձայնություն» կուսակցության նախագահ, ՀՀ նախագահի թեկնածու Արամ Հարությունյանը:
Հարությունյանի խոսքով՝ այս անգամվա նախագահական ընտրություններում չկան նախագահի կեղծ թեկնածուներ:
Հարությունյանը ի պատասխան լրագրողների հարցի՝ իր առաջադրվելու հետ կապված, հետեւյալն ասաց. «Եթե անգամ միայն ես ինձ ձայն տամ, միեւնույն է՝ իմ առաջադրումն արդարացված է»:
Կարդացեք նաև
Նախագահի թեկնածուի խոսքով՝ այժմ հավասար մրցակցային պայմաններ չկան, իսկ որոշ նախագահի թեկնածուների, այն էլ այս տոնական օրերին, Ձմեռ պապուց եւ Ձյունանուշից շատ են ցուց տվել, իսկ ինքը վերջին 5 տարում ամենաքիչ լուսաբանված թեկնածուն է: Հարությունյանը նշեց, որ պատրաստ է բոլորի հետ բանավիճել, բայց Հայաստանում դեռ նման մշակույթ ձեւավորված չէ:
«Իմ հիմնական մրցակիցը Սերժ Սարգսյանն է, իսկ երկրորդ փուլում ձայներս կտամ Սերժ Սարգսյանի մրցակցին»,-ասաց Հարությունյանը՝ նշելով, որ այժմ գլխավոր խնդիրն այս իշխանությունից ազատվելն է, այս իշխանությունն ամենակոռումպացվածն է:
Եվա ՀԱԿՈԲՅԱՆ
