Հունաստանն ու Իսպանիան մնում են գործազրկության ամենաբարդ խնդիրներն ունեցող եվրոպական պետությունները
Եվրոյի գոտու պետություններում գործազրկության ցուցանիշները հասել են ռեկորդային 11,8 տոկոսի:
Եվրոպական Միության կողմից երեքշաբթի օրը հրապարակված գործազրկության տվյալների մասին զեկույցը վերաբերում է 2012 թվականի նոյեմբերին: Ըստ զեկույցի, այդ ամսվա ընթացքում եվրոն որպես վճարման միջոց օգտագործող պետություններում առանց աշխատանքի էր մնում մոտ 19 միլիոն մարդ՝ 113 հազարով ավելացնելով նախորդ ամսվա ընթացքում գրանցված ցուցանիշները:
Համեմատություն անցկացնելով նախորդ տարվա ցուցանիշների հետ՝ զեկույցը վկայում է այն մասին, որ ի տարբերություն անցյալ տարվան, գործազուրկների թիվն ավելացել է երկու միլիոնով:
Կարդացեք նաև
Հունաստանն ու Իսպանիան մնում են գործազրկության ամենաբարդ խնդիրներն ունեցող եվրոպական պետությունները, որոնցից յուրաքանչյուրում գործազրկության ցուցանիշը գերազանցում է 26 տոկոսը: Այս պետություններում երիտասարդների շրջանում գործազրկությունն ավելի բարձր է և հասնում է 57 տոկոսի:
Զեկույցում նշվել են նաև Եվրոպական Միության անդամ բոլոր 27 պետություններում գրանցված գործազրկության վերաբերյալ տվյալները, որոնք, ի տարբերություն եվրոյի գոտու, փոփոխություն չեն գրանցել: Անցյալ տարվա հոկտեմբեր և նոյեմբեր ամիսներին Եվրամիության պետություններում գործազրկության ցուցանիշները մնացել են անփոփոխ՝ 10.7 տոկոս մակարդակի վրա, գործազուրկ է մնում մոտ 26 միլիոն մարդ:
Արմեն Հովհաննիսյան
«Ամերիկայի Ձայն»
