Բոլոր նրանց, ովքեր նախագահական ընտրությունները որոշել են բոյկոտել եւ ոչ մեկին չսատարել՝ «Ժառանգության» առաջնորդ Րաֆֆի Հովհաննիսյանը պատասխան տվեց՝ «ամենահեշտը տանը նստելն է»: Ավելին՝ պարոն Հովհաննիսյանը, կարծես ՀԱԿ հայտարարության մեջ առկա քննադատությանն արձագանքելով, վստահեցրեց, որ ով տանը նստում է, կամա թե ակամա նպաստում է այս իշխանության վերարտադրմանը:
Նախագահական ընտրություններին չմասնակցելու եւ ոչ մեկին չսատարելու որոշում ընդունած «Հայրենիք ու պատիվ» կուսակցության նախագահ Գառնիկ Մարգարյանն Aravot.am-ի հետ զրույցում այսպես պատասխանեց «Ժառանգության» առաջնորդին. «Մենք տանը նստա՞ծ ենք: Րաֆֆին տանը նստած է եղել 20 տարի: Րաֆֆին օտարի տանը նստած է եղել: Դե թող գա, նստենք փաստերով ապացուցեմ հակառակը: Սեմինարներ անցկացնելով այս ռեժիմի դեմ չեն պայքարում, հասկանո՞ւմ եք»:
Մեր դիտարկմանը, որ հիմա ինքն առաջադրվել է, գոնե փորձում է մի բան փոխել, Գառնիկ Մարգարյանը պատասխանեց. «Դե թող տեսնենք՝ ժողովուրդը կգնա՞ նրա հետեւից, ի՞նչ է առաջարկելու: 5 տարի պառլամենտում էր, ի՞նչ առաջարկեց: Այդպես չի»:
Հռիփսիմե ՋԵԲԵՋՅԱՆ
Կարդացեք նաև
