2012թ. դեկտեմբերի լույս 25-ի գիշերը Իջեւան քաղաքի կենտրոնում, շուկային հարակից տարածքում թալանվել է Իջեւանի ավագանու անդամ Արտակ Խաչատրյանի ոսկեղենի խանութը: Ըստ որոշ տեղեկությունների՝ գողացված ոսկեղենի եւ արծաթեղենի ընդհանուր արժեքը շուրջ 100 հազար դոլար է: ՀՀ ոստիկանության ինտերնետային կայքում( www.police.am) մենք տեղեկատվություն չգտանք խոշոր չափերի այս գողության վերաբերյալ: Ինչո՞ւ դեպքի մասին կայքում տեղեկատվություն չկա: Սույն հարցը ցանկացանք ճշտել ոստիկանության լրատվական ծառայությունից: Հունվարի 8-ին զանգահարեցինք «Սփյուռ» տեղեկատու, հարցրինք ՀՀ ոստիկանության լրատվական ծառայության հեռախոսահամարը: Տեղեկատու ծառայությունից տրամադրեցին 52-03-10 հեռախոսահամարը: Զանգահարեցինք այդ համարով, հարցրինք ՀՀ ոստիկանության լրատվական ծառայության հեռախոսահամարը: Ոստիկանությունից տվեցին 56-00-05 հեռախոսահամարը: Հիշյալ համարին մեր զանգերն անպատասխան մնացին: Ստիպված զանգահարեցինք նույն՝ 52- 03-10 հեռախոսահամարով, մեզ ասացին, որ արդեն ընդմիջման ժամ է, թեեւ 12-ն անց էր 50 րոպե: Ընդմիջումից հետո մի քանի անգամ եւս զանգահարեցինք նույն՝ 56-00-05 հեռախոսահամարով, սակայն այն լռում էր: Կրկին ներկայանալով որպես լրագրող, նորից զանգահարեցինք 52-03-10 հեռախոսահամարին, հայտնելով, որ լրատվական ծառայության հեռախոսահամարը չի պատասխանում: Տվեցին 54-87-65 հեռախոսահամարը, ասացին, որ դա ոստիկանության լրատվական ծառայության պետի տեղակալ Մուշեղ Կրոյանի հեռախոսահամարն է: Սակայն այդ համարին կատարած մեր մի քանի զանգերին նույնպես պատասխանող չեղավ: Անընդհատ խոսվում է, որ ՀՀ ոստիկանությունը բարեփոխվել է, այն ավելի ուշադիր եւ արձագանքող է դարձել հասարակության եւ լրատվամիջոցների ահազանգերին, սակայն իրականում որքանո՞ վ է այդպես: Օրինակ, Տավուշի մարզում գործում են ոստիկանության մարզային վարչություն, ոստիկանության 4 բաժիններ, սակայն չկա ոստիկանության մի պաշտոնյա, ով ի պաշտոնե պարտավոր լինի, ում հանձնարարված լինի պատասխանել մարզի լրագրողների հարցերին: Մենք էլ ստիպված ենք զանգահարել Երեւան:
Ոսկան ՍԱՐԳՍՅԱՆ
