Որքա՞ն գումար է ծախսվել ֆիրմաների, պետական գերատեսչությունների, բանկերի եւ այլ կազմակերպությունների ամանորյա կորպորատիվների վրա. Aravot.am-ի այս հարցին «Արմենիա Մարիոթ» հյուրանոցից, որտեղ պարբերաբար խոշոր ընկերություններ բանկետներ են կազմակերպում, Անահիտ Թանթուշյանը պատասխանեց, որ 2012 թվականի տարեվերջին 4-5 ամանորյա կորպորատիվ է կազմակերպվել: Թե որ ֆիրմաների պատվերով է եղել ու ինչքան գումար վճարվել յուրաքանչյուրի համար, մեզ ճշտել չհաջողվեց, հյուրանոցից մեզ պատասխանեցին, որ դա խիստ գաղտնի ինֆորմացիա է եւ իրենք իրավունք չունեն հրապարակել ուրիշի ծախսերը:
Պետական գերատեսչություններում (առողջապահության նախարարություն, նախագահական, կառավարություն եւ այլն) տոնական տրամադրությունները դեռ շարունակվում են, այնտեղից եւս որեւէ բան պարզել չհաջողվեց, որովհետեւ հեռախոսազանգերին պատասխանող չգտնվեց:
Բանկերում, որոնք ոչ պակաս շքեղ են նշում տոները, ամանորյա կորպորատիվների համար ծախսած գումարի չափը, ոչ «Կոնվերսբանկի», ոչ էլ «Յունիբանկի»՝ չիմացանք, նպատակահարմար չգտան պատասխանել: Մի շարք կազմակերպություններ՝ ամանորին ծախսած գումարի չափը չհրապարակելը համարեցին «տան ծախս, որը ոչ մեկին չի վերաբերվում»:
Բջջային օպերատորներից՝ «Օրանժ Արմենիան» ընդհանրապես չցանկացավ մեկնաբանել, միջոցառում արվել է, թե ոչ, կամ՝ որքան գումար են ծախսել, եւ այլն:
Կարդացեք նաև
«ՎիվաՍել ՄՏՍ» ընկերությունից էլ խոստացան պատասխանել, սակայն առայժմ հնարավոր չեղավ ճշտել, քանի որ իրենց մոտ եւս տոնական տրամադրությունները շարունակվում են, եւ ոչ բոլոր բաժիններում է սկսվել աշխատանքային գործընթացը:
Եվա ՀԱԿՈԲՅԱՆ
Լուսանկարը` արխիվային
