Իջեւանում, Տավուշի մարզի առաջին ատյանի դատարանում (դատավոր՝ Ռաֆիկ Մելքոնյան) ընթանում է Իջեւան քաղաքի 24-ամյա բնակիչ Գեւորգ Օթարյանի դատավարությունը: Նա մեղադրվում է այն բանում որ ապօրինի հատել է 23 հատ հաճարենի եւ մեկ թխկենի՝ պետությանը պատճառելով 2 միլիոն 568 հազար դրամի վնաս:
Նախկինում չդատված Գ. Օթարյանի նկատմամբ խափանման միջոց է ընտրվել չհեռանալու մասին ստորագրությունը: Նա մեղադրվում է ՀՀ քրեական օրենսգրքի 296 հոդվածի 3-րդ մասով («Ծառերի, թփերի, բուսածածկի ապօրինի հատումը, որը խոշոր վնաս է պատճառել»): Այդ հոդվածը նախատեսում է կալանք՝ առավելագույնը 3 ամիս ժամկետով կամ ազատազրկում՝ առավելագույնը 5 տարի ժամկետով: Սույն գործով դատական երկրորդ նիստը նշանակված է հունվարի 11-ին:
Ոսկան ՍԱՐԳՍՅԱՆ
