Հայաստանի մարտական կարատե կոբուդոյի ազգային ֆեդերացիայի նախագահ, արևելյան մարտարվեստի պրոֆեսոր Տարոն Աբրահամյանը, որն առաջադրվել է նախագահի թեկնածու, սակայն դեռևս կենտրոնական ընտրական հանձնաժողով չի ներկայացրել 8 միլիոն ընտրագրավի մուծման անդորրագիրը, ՇԱՆԹԻՆ հայտնեց, որ գումարը չմուծելու պատճառն այն է, որ ոչ թե ընտրական գումարի, այլ հետագա ընտրական ծախսերը հոգալու խնդիր կար: Իսկ քանի որ նաև այդ հարցն է լուծվել, և երեքշաբթի իր հովանավորից սպասում են ստանալ այդ գումարը, կարծում է, որ կհասցնեն մինչև ժամկետի ավարտը: Հովանավորի մասին Տարոն Աբրահամյանը միայն փոխանցեց, որ մարզական շրջանակներից է, Հայաստանի քաղաքացի, որը ժամանակավորապես Ռուսաստանում է այժմ:
ԿԸՀ-ն այս հարցով նիստ կգումարի հավանաբար հաջորդ շաբաթվա առաջին կեսին, որպեսզի սահմանված կարգով հնարավորություն տա 48 ժամում շտկելու կամ լրացնելու այն հավակնորդների փաստաթղթերը, որոնք թերություններով կամ ոչ ամբողջական են ներկայացրել դրանք:
