Նախագահի թեկնածու, Մամուլի ազգային ակումբի նախագահ Նարինե Մկրտչյանը այս պահի դրությամբ չունի ընտրական 8 միլիոն դրամ գրավը, բայց դեռ հույս ունի, որ օրենքով սահմանված 48 ժամվա ընթացքում կհասցնի ԿԸՀ ներկայացնել գրավի վճարման անդորրագիրը:
Aravot.am-ի հարցին, որտեղի՞ց է այս կարճ ժամկետում ձեռք բերելու 8 միլիոն դրամը, տիկին Մկրտչյանը պատասխանեց. «Հենց գտնեմ, անպայման կասեմ, եթե , իհարկե, համաձայնություն ձեռք բերեմ ասելու: Չեմ պատրաստվում դեռ դուրս գալ ընտրապայքարից: Եթե հնարավորություն ունենամ, անպայման կվճարեմ գրավը»:
Մեր հարցին, ինչպե՞ս եք ձեզ պատկերացնում ընտրապայքարում, եթե ընտրական գրավը չվճարեք, նախագահի թեկնածուն ասաց՝ այդ հարցին դեռ ժամանակ կունենա պատասխանելու:
Հիշեցնենք՝ եթե օրենքով սահմանված 48 ժամվա ընթացքում նախագահի թեկնածուները չհասցնեն ԿԸՀ ներկայացնել ընտրական գրավի վճարման անդորրագիրը, նրանց թեկնածության գրանցումը կմերժվի։ Իսկ թեկնածուների գրանցումը տեղի կունենա հունվարի 4-ից 14-ն ընկած ժամանակահատվածում։
Կարդացեք նաև
Տիկին Մկրտչյանից նաեւ հետաքրքրվեցինք՝ ինչպես է վերաբերում այն գնահատականներին, թե ամեն պատահական մարդ թեկնածություն է առաջադրում ու ընտրությունները վերածում խեղկատակության. «Որակումներին չեմ միանա, ոչ միայն որ համաձայն չեմ, այլեւ նպատակահարմար չեմ գտնում արձագանքել նման գնահատականներին: Ավելի որոշակի պատասխաններ կտամ ժամկետը լրանալուց հետո, որովհետեւ մարտավարություն է փոխվում, ռազմավարություն է փոխվում»:
Արփինե ՍԻՄՈՆՅԱՆ
