Aravot.am-ը դաշնակցական պատմաբան Արշավիր Գասպարյանին հարցրեց, թե որպես Հրանտ Բագրատյանի վարչապետությանն ականատես եղած մտավորական, ինչպե՞ ս է վերաբերում նրա նախագահի թեկնածու առաջադրվելու փաստին:
«Ինձ թվում է առաջնորդվել են հետևյալ սկզբունքով. եթե ՀԱԿ-ից չառաջադրվեց Լևոն Տեր-Պետրոսյանը, երկրորդ, ոնց որ ասում են, ռեզերվայինը մնում էր Հրանտ Բագրատյանը: Իսկ նա, իմ կարծիքով, իր ընտրազանգվածով, իր գործողություններով չի կարող եղանակ ստեղծել: Այդպես որ հիմա խոսում է՝ ժամանակին ինքը վարչապետ է եղել Հայաստանի Հանրապետության, այստեղ նույն հասարակությունը պիտի մտածի, թե ի՞նչ իրավիճակ էր իր վարչապետության շրջանում, և ի՞նչը ինքը կարող է այսօր փոխել: Օրինակ` ես չգիտեմ, Հրանտ Բագրատյանը ինչպե՞ս է փոփոխելու: Դեռ կգա ժամանակը: Իր ծրագիրը դեռ չեմ կարդացել ու տեսել, բայց ամեն դեպքում՝ էլի ուժ է, որը գոնե մտել է քաղաքական դաշտ և ուզում է փոփոխություններ ներկայացնել: Բայց իմ կարծիքով՝ այդ ուժը չէ, որը կարող է իր հետևից տանել մասսաներին», -ասաց Արշավիր Գասպարյանը:
Մեր այն հարցին էլ` մի՞թե Լևոն Տեր-Պետրոսյանից հետո ՀԱԿ-ից նախագահի ամենահարմար թեկնածուն «Ազատություն» կուսակցության ղեկավար Հրանտ Բագրատյանն է, թե՞ կան նաև այլ ակտիվ գործիչներ, օրինակ ասենք Նիկոլ Փաշինյանը, ժամանակը չէ՞ սերնդափոխելու , ավելի երիտասարդներին շանսեր տալու, մեր զրուցակիցը պատասխանեց.«Դա արդեն ՀԱԿ-ի խնդիրն է, ունեն ռեզերվային այլ թեկնածու, թե ոչ: Բայց իմ կարծիքով՝ ՀԱԿ-ն այսօր չի կարող համարվել այն ուժը, որ ինքը կարողանա ներդրվել ու անցնել: Անձերի վրա չեմ ուզում կենտրոնանալ, կասեմ, որ ՀԱԿ-ը որպես ընդդիմություն կայացած չէ»:
Ի դեպ, մեր զրուցակցի բնութագրելով, ընդդիմությունն այն ուժն է, որի շունչը իշխանությունը իր թիկունքում պիտի զգա, իսկ Հայաստանում չկա նման ուժ:
Կարդացեք նաև
Նունե ԱՐԵՎՇԱՏՅԱՆ
