2013թ. հունվարի 3-ին Բաքվից Թբիլիսի է ժամանել Կովկասի մահմեդականների առաջնորդ Ալահշուքյուր Փաշազադեն` մասնակցելու Վրաստանի պատրիարք Իլյա Երկրորդի ծննդյան 80 եւ գահակալման 35- ամյակի տոնակատարություններին: Փաշազադեին օդանավակայանում դիմավորել է անձամբ կաթողիկոս Իլյա Երկրորդը: Իսկ այսօր նրանց հանդիպման ժամանակ Իլյա Երկրորդն ասել է.«Ես երբեք չեմ համաձայնի այն մտքի հետ, որ մենք կորցրել ենք մեր հողերը`ամենեւին ոչ: Մենք պարզապես ժամանակավորապես կորցրել ենք վերահսկողությունը այդ տարածքների նկատմամբ: Սակայն արդարությունն անպայման մի օր կվերականգնվի: Ինչպես Աբխազիան եւ Հարավային Օսիան ի սկզբանե եղել են Վրաստանի հողերը, այնպես էլ Լեռնային Ղարաբաղը պատկանել եւ պատկանում է Ադրբեջանին: Կովկասի մահմեդականների հոգեւոր առաջնորդի այցը Վրաստան` վրացի եւ ադրբեջանցի ժողովուրդների բարեկամության դրսեւորումն է»:
Հիշեցնենք միայն, որ սա Իլյա 2-րդի` քաղաքական հայտարարություններից միակը չէ: Երեք տարի առաջ` 2009 թ. նոյեմբերին, երբ նա այցելել էր Բաքու, նմանատիպ հայտարարություն էր արել: Ասել էր. «Չնայած, որ մենք միշտ երազել ենք, որ մեր երկրները անկախ լինեն, մեր սպասումները չարդարացան` խախտվել է թե Վրաստանի, եւ թե Ադրբեջանի տարածքային ամբողջականությունը: Մենք երբեք թույլ չենք տա , որ տարածաշրջանային ամբողջականության խախտումը ընդմիշտ արմատավորվի, մենք կանենք ամեն ինչ, որ վերականգնենք այն»:
