Ֆրանսիացի աշխարհահռչակ դերասանուհի Բրիջիտ Բարդոն, ով հայտնի է նաեւ կենդանիների պաշտպանությանն ուղղված իր ակտիվ գործունեությամբ, ուրբաթ օրը հայտարարել է, որ կդիմի Ռուսաստանի քաղաքացիություն ստանալու համար` եթե Ֆրանսիայի իշխանությունները չհրաժարվեն Լիոն քաղաքի կրկեսի երկու հիվանդ փղերին քնեցնելու միջոցով սպանելու մտադրությունից:
«Եթե իշխանություններն այնքան վախկոտ ու անամոթ գտնվեն, որ սպանեն Բեբի եւ Նեպալա փղերին, ես կհայցեմ Ռուսաստանի քաղաքացիություն, որպեսզի փախչեմ մի երկրից, որն ավելի շատ կենդանիների գերեզմանատուն է հիշեցնում», – Բարդոյի խոսքերն է մեջբերել «Ֆրանս Պրես» գործակալությունը:
Անցած դեկտեմբերին Լիոնի ոստիկանապետը որոշում է կայացրել կրկեսի երկու փղերին քնեցնելու մասին, քանի որ կասկած կա, թե նրանք հիվանդ են:
Երեկ, հիշեցնենք, հայտնի դարձավ, որ Ռուսաստանի նախագահ Վլադիմիր Պուտինը քաղաքացիություն է շնորհել ֆրանսիացի դերասան Ժերար Դեպարդյեին։ Դերասանը, ով նախագահական ընտրությունների ժամանակ բացահայտ կերպով սատարում էր նախկին նախագահ Նիկոլա Սարկոզիին, որոշեց փոխել բնակության վայրը նոր նախագահ Ֆրանսուի Օլանդի հարկային «բարեփոխումների» պատճառով։
Կարդացեք նաև
«Ազատություն» ռադիոկայան
