Բնական աղետների պատճառով կորուստները 2012 թվականին հասել են մինչեւ 160 մլրդ դոլարի, ընդ որում դրանից 65 մլրդ դոլարը ապահովագրված դեպքերի վճարումներն են: Այդ մասին հայտարարում է գերմանական վերաապահովագրող Munich Re ընկերությունը, որի տեղեկություններով, ընդհանուր կորուստների 67%-ը եւ ապահովագրված դեպքերի 90%-ը ԱՄՆ-ում պատահած բնական աղետների արդյունքն են:
Խոսքը գնում է առաջին հերթին «Սենդի» փոթորիկի մասին, որի արդյունքում կրած վնասները կազմում են մոտ 25 մլրդ դոլար: Բացի այդ, ԱՄՆ-ը լուրջ տուժել է նաեւ այս ամառվա երաշտից եւ բազմաթիվ տորնադոներից:
Այսքանից հետո պետք է նշել, որ 2012-ի վնասները բավականին ավելի քիչ են, քան նախորդ տարի, երբ ապահովագրված կորուստները կազմել էին 119 մլրդ դոլար, իսկ ընդհանուր առմամբ` բնությունը մարդկանց հասցրել էր 400 մլրդ դոլարի վնաս. Դա հիմնականում կապված էր Ճապոնիայում եւ Նոր Զելանդիայում տեղի ունեցած երկրաշարժերի եւ Թայլանդում տեղի ունեցած ջրհեղեղի հետ:
Հարկ է նշել, որ սովորաբար ապահովագրված կորուստները տարեկան կազմում են միջինը 9 մլրդ դոլար:
Բնական աղետների հետեւանքով մարդկային զոհերի քանակը 2012 -ին անհամեմատ փոքր է եղել, քան վերջին տասնամյակի միջինն է` 9,5 հազար մարդ` 106 հազարի դիմաց: 2011-ին, օրինակ, աղետներից զոհվել է 27200 մարդ: Դա կապված է այն բանի հետ, որ այս տարի խոշոր աղետներ չեն եղել «երրորդ աշխարհի» երկրներում, որտեղ սովորաբար, դրանց հետեւանքները շատ ավելի զգալի են լինում, քան զարգացած երկրներում:
