Պատմամշակութային արգելոց թանգարանների եւ պատմական միջավայրի պահպանության ծառայություն ՊՈԱԿ-ի խմբագիր, ՀՀ նախագահի թեկնածու Գարեգին Ղազարյանը, այսօր Վարչական դատարանում բողոքարկեց վերջին 10 տարում Հայաստանում մշտապես բնակվելու վերաբերյալ իրեն տեղեկանք չտրամադրելու ՀՀ Ոստիկանության անձնագրերի եւ վիզաների վարչության որոշումը:
Պարոն Ղազարյանը, ընտրություններում իր հաղթելու շանսերը, ինչպես ինքն է գնահատում` «զրոյին ձգտող է», իսկ տեղեկանք ձեռք բերելն էլ ընտրություններում ամեն գնով առաջադրվելու նպատակ չի հետապնդում: «2007-ին, երբ ԱԺ պատգամավորի թեկնածու առաջադրվեցի, ինձ էլի տեղեկանք չտվեցին: Ես հպարտ եմ, որ ապրել եմ Արցախում ու աշխատել եմ Քաշաթաղի շրջանում: Չեմ ժխտում, անձնագրային նշումս էլ պահպանվում է, բայց եկեք հիշենք նախադեպերը: Ռոբերտ Քոչարյանը 1997-ի մարտին եկավ Երեւան, մշտապես բնակվում էր Արցախում, ընտրվել էր 5 տարով նախագահ , բայց 1998 –ին արտահերթ նախագահական ընտրություններում նույն վարչությունը նրան առանց խնդիրների տվեց տեղեկանք : Հիշենք նաեւ գործող նախագահի նախադեպը՝ 1990-ին, մշտապես բնակվելով Ստեփանակերտում, ընտրվեց Հայաստանի գերագույն խորհրդի պատգամավոր: 2003-ին էլ ինքը դեռ 6 տարի էր բնակվում Երեւանում էլի 10 տարվա տեղեկանք տվեցին: Վերին ատյան կա՞, արտոնյալ խավ կա՞, որին կարելի է, իսկ ինձ չէ՞: Հիմա հանուն արդարության , սկզբունքի եւ ոչ թե հավակնությունների եմ պայքարում: Պարտադրում եմ պետությանը, որ ինձ տեղեկանք տա»,- Aravot.am-ին ասաց պարոն Ղազարյանը:
Նա համոզված է, որ այս ընտրությունները առանց կեղծիքների են անցնելու. «Փայլուն ընտրություններ են լինելու: Ղեկավարներն արդեն ապրում են 2018 թվականի օրացույցով , մտածում են՝ 2018-ին ո՞վ է լինելու նախագահ, իրենց ժառանգորդ: Աշխարհն ու Եվրոպան կարող են ծափահարել, որ լինելու է անկեղծիք ու թափանցիկ ընտրություն, ուղղակի կեղծիքի կարիք չկա: Մաքուր ընտրություններ՝ մեկ փուլով»:
Պարոն Ղազարյանի հայցով դատավճիռը կհրապարակվի վաղը, բայց նա վստահ է՝ այս անգամ էլ են մերժելու:
Կարդացեք նաև
Հիշեցնենք, որ այսօր կրկին Վարչական դատարանում ՀՀ Ոստիկանության անձնագրերի եւ վիզաների վարչության՝ տեղեկանք չտրամադրելու որոշումը բողոքարկել էր նախագահի մեկ այլ թեկնածու՝ Սուրենավանի բնակիչ Մարտիկ Սարգսյանը:
Արփինե ՍԻՆՄՈՆՅԱՆ
