Այսօր Aravot.am-ը պատմական գիտությունների թեկնածու Արշավիր Գասպարյանին հարցրեց` արժանահավատ համարո՞ւմ է ՀՀ հիմնադիր նախագահ Լևոն Տեր-Պետրոսյանի այն պատճառաբանությունը, թե նախագահական ընտրություններում իր թեկնածությունը չի առաջադրում 68 տարեկան, այսինքն տարեց լինելու պատճառով: «Ռեյգանը 80 քանի տարեկան չէ՞ր, որ առաջադրվեց: Ես կասեմ հակառակը, տարիքը նաև իմաստնություն է խորհրդանշում: Ավելին, վերցնենք թե գեներալ դե Գոլին, թե Ուինսթոն Չերչիլին, նրանք բնականաբար 60-70 տարեկանից ավելի էին, որ ղեկավար դարձան: Իմ կարծիքով, պատճառը տարիքը չէ, ՀՀ առաջին նախագահն զգաց, որ չունի այն ընտրազանգվածը, ավելին՝ նա հուսախաբ արեց այն 350 հազար մարդկանց, որոնք նախկինում քվեարկել են նրա օգտին, և այսօր զգում է, որ ինչպես ասում են` իր գնացքը մեկնել է:
Առաջին նախագահն իր քաղաքական գործունեությունն ավարտել է: Մենք չպետք է գնանք դեպի առաջին նախագահ, երկրորդ նախագահ: Ընդհակառակը՝ մենք պետք է առաջ գնանք, նոր ուժեր են մեզ այսօր հարկավոր: Ցավալին այն է, որ մենք փորձում են հինը վերադարձնել, կարոտախտով ենք ապրում, ոչ մի երկրում երբեք չեն ասում առաջին, երկրորդ, երրորդ նախագահ ,այլ ընդհակառակը՝ ասում են նրանք իրենց առաքելությունը կատարել են: Նրանք գնում են նորին, լավին, բարձրին, իսկ մենք ցավոք միշտ պետք է տատանվենք անցյալի ու ներկայի միջեւ: Իսկ իմ կարծքով, այսօր մեզ երրորդ ուժ է հարկավոր»,- ասաց մեր զրուցակիցը:
Նունե ԱՐԵՎՇԱՏՅԱՆ
