Երեկ Գյումրու ավագանին 20 կողմ ու 1 ձեռնպահ հարաբերակցությամբ հաստատեց քաղաքի գլխավոր փաստաթուղթը, որի վրա, ըստ նորընտիր քաղաքապետ Սամվել Բալասանյանի, բավականին երկար են աշխատել, շատ են չարչարվել, նույնիսկ` շաբաթ –կիրակի: Բյուջեն կազմում է 3 միլիարդ 729 միլիոն դրամ: Իսկ պետության կողմից Գյումրուն հատկացվող դոտացիան 1 միլիարդ 800 միլիոն է: Քաղաքապետ Սամվել Բալասանյանի ասելով, իրենց հիմնական նպատակն այն է, որ 8,2 տոկոսով աճ ունենան: Հայտարարելով, որ բյուջեն իրատեսական է, Գյումրու քաղաքապետը այդուհանդերձ անդրադարձավ քաղաքի գրադարանների աշխատակիցների բողոքին, որոնք դժգոհում էին Սամվել Բալասանյանից, թե վերջինս եկած-չեկած որոշել է իրենց անգործ թողնել, գրադարաններում օպտիմալացում անել:
Այս ավագանու նիստի ժամանակ էլ Սամվել Բալասանյանը հարկադրված եղավ խոսել Վարդան Ղուկասյանի ատկատներից` նեղսրտելով, որ վերջինս ուռճացած հաստիքներ է պահել մշակույթի ոլորտում`գրադարաններում, երաժշտական դպրոցներում և մանկապարտեզներում: «Ասեմ, հիմնականում հաստիքները ուռճացրել են հունիս ամսից սկսած , տարբեր մշակութային օջախներում և գրադարանների հետ կապված և երաժշտական դպրոցների, եղել են շատ նոր մարդիկ ընդունված, և էնքան շատ մարդ են ընդունվել, որ փաստորեն աշխատանքային ֆոնդից հիմա դուրս են մնում, դրա համար ստիպված ոնց որ մենք կարողանանք տեղավորվել մեր աշխատավարձի ֆոնդի մեջ, բայց էսպիսի պատկեր է ստացվում», -նեղվեց քաղաքապետը:
Ավագանու անդամ Լևոն Բարսեղյանը հետաքրքրվեց, թե ի՞նչ աշխատակազմ է եղել գրադարաններում, և ի՞նչ են նախատեսում, ավելանալո՞ւ է աշխատակիցների թիվը, թե՞ պակասելու է: Այս հարցին պատասխանեց քաղաքի գլխավոր ֆինանսիստ Լենա Ջիլավյանը. «Աշխատակազմը պակասելու է, որովհետև մեխանիկորեն ավելացված աշխատակազմ է»: Սամվել Բալասանյանն էլ շարունակեց. «Ես ձեզ ասեմ, գրադարանների հետ կապված շատ տխուր պատկեր է , էսօրվա դրությամբ ասենք 10 մարդ, ուղղակի տեղ չկա նստելու և 10 աշխատակից ունի ինչ-որ մի հատ գրադարան, որտեղ անհրաժեշտ է ընդամենը 3 աշխատակից, ոնց որ թե անպայման վերանայելու կարիք կա: Դրա համար մենք որոշեցինք, փորձեցինք վճարել նաև դեկտեմբեր ամսվա աշխատավարձը, որպեսզի հունվարին հարցը ուսումնասիրենք տրամաբանության սահմաններում, ու նոր միայն որոշում կայացնենք: Ունենք խնդիրներ նաև նախակրթարանների հետ կապված, հունվարից սկսելու ենք ամեն մի գրադարանի, նախակրթարանի, երաժշտական դպրոցի հետ աշխատել, որպեսզի մեզ համար հասկանալի լինի, եթե անհրաժեշտ է փոփոխություն, անպայման ավագանուն կներկայացնենք»:
Լենա Ջիլավյանն էլ տեղեկացրեց, որ գրադարանների աշխատանքային ֆոնդում տեղաշարժ է կատարվել 260 հազար դրամով, 41 միլիոն է պլանավորված եղել, սակայն վերջնականապես պլանավորվել է 40 միլիոն:
Կարդացեք նաև
Տեսնելով, որ ավագանու այլ անդամներ հարցեր չունեն բյուջեի հետ կապված, Սամվել Բալասանյանը ևս անկեղծորեն զարմացավ: «Վերջը հասարակ փաստաթուղթ չէ», -ակնարկեց քաղաքապետը: Բյուջեի նախագիծը ընդունվեց ձայների մեծամասնությամբ, որից հետո Սամվել Բալասանյանը առաջարկեց . «Դե մի հատ ծափահարեք»:
Նշենք, որ ըստ Վարդան Ղուկասյանի շրջապատի մարդկանց, նախկին քաղաքապետը «չէ» ասել չուներ, իրեն դիմողներին չէր մերժում, մի կերպ աշխատանքի էր տեղավորում, որի պատճառով էլ ստացվել է «լեվի» հաստիքների այս պատկերը: Փաստորեն, Ղուկասյանին մոտ ստացվում է` դարձյալ վատամարդ հանել Բալասանյանին:
Նունե ԱՐԵՎՇԱՏՅԱՆ
