Առաջին տեղում Սերժ Սարգսյանն է, երկրորդ տեղում է Գագիկ Ծառուկյանը, երրորդ տեղում՝ Տիգրան Սարգսյանը, հետո՝ Ռոբերտ Քոչարյանն ու Լեւոն Տեր-Պետրոսյանը, վերջում՝ Րաֆֆի Հովհաննիսյանն ու Պարույր Հայրիկյանը: Իրենց ազդեցության մակարդակով այսպիսի տեղեր են զբաղեցրել քաղաքական գործիչները նախագահական ընտրություններից առաջ՝ «Սոցիոմետր» կենտրոնի նախագահ Ահարոն Ադիբեկյանի հարցումներով:
Aravot.am-ի հետ զրույցում, այս առնչությամբ «Ժառանգություն» կուսակցության փոխնախագահ Արմեն Մարտիրոսյանը պատասխանեց, որ ինքն այլեւս սոցիոլոգիական հարցումներին մեկնաբանություններ չի տալիս, որովհետեւ օբյեկտիվ իրավիճակը չի ներկայացվում. « Ես «Գելափի» հետ կապված մեկ պատասխան եմ տվել, նույնը կարող եմ կրկնել՝ եթե բոլորը կապացուցեն, որ հայ ժողովուրդը հոգեկան որոշակի խնդիրներ ունի եւ ինքն իրեն ցավ պատճառելու մազոխիստական հակում ունի, այդ դեպքում ես կհամաձայնվեմ այս սոցիոլոգիական հարցումների արդյունքի հետ: Հակառակ պարագայում ինչպե՞ս կարող է աղքատությունը խորանա, արդարության նկատմամբ վստահությունը նվազի, այդպիսի մեծ ծավալի արտագաղթ լինի երկրում, ու հանկարծակի իշխանությունների կամ իշխանության որեւէ ներկայացուցչի նկատմամբ այդպիսի մեծ վստահություն լինի: Ուղղակի աբսուրդ է»:
Մեր հարցին՝ Ռոբերտ Քոչարյանին այդպիսի մեծ տեղ տալն արդյո՞ք նշանակում է, որ ժողովուրդը մոռացել է Մարտի 1-ը՝ նա պատասխանեց. «Քանի որ ես չեմ հավատում, ուստի մեկնաբանելն էլ սխալ է»:
Հռիփսիմե ՋԵԲԵՋՅԱՆ
