Թեեւ վերջին ամիսների ուսումնասիրությունը ցույց է տվել, որ Լոռու մարզի համայնքների սեփական եկամուտների հավաքագրումը կայունացման միտում ունի, այնուամենայնիվ, 2012 թվականի դեկտեմբերի 25-ի տվյալներով, մարզի 113 համայնքներից 67-ի եկամուտների հավաքագրումը նախորդ տարվա համեմատ անկում է ապրել:
Այդ մասին այսօր կայացած Լոռու մարզխորհրդի տարեվերջյան նիստի ժամանակ ասաց Լոռու մարզպետարանի աշխատակազմի ֆինանսական եւ սոցիալ-տնտեսական զարգացման վարչության պետ Սեւակ Հովհաննիսյանը:
Անդրադառնալով մարզի համայնքների բյուջեների 2012 թվականի անցած ժամանակաշրջանի սեփական եկամուտների կատարման և կուտակված աշխատավարձերի պարտքերին` Սեւակ Հովհաննիսյանը նշեց, որ համայնքների սեփական եկամուտները դեկտեմբերի 25-ի դրությամբ կազմել են 1 միլիարդ 367,1 միլիոն դրամ կամ 88 տոկոս` նախորդ տարվա 87, 8 տոկոսի դիմաց:
Նրա փոխանցմամբ եկամուտների ինդեքսը 2011 թվականի նկատմամբ կազմել է 96, 6 տոկոս:
Կարդացեք նաև
«Այլ կերպ ասած` պակաս է հավաքագրվել 48, 6 միլիոն դրամ: Իսկ ահա վարչական բյուջեի եկամուտների պլանը մարզում կատարվել է 96 տոկոսով` նախորդ տարվա 95, 8 տոկոսի դիմաց»,-տեղեկացրեց Լոռու մարզպետարանի աշխատակազմի ֆինանսական եւ սոցիալ-տնտեսական զարգացման վարչության պետը:
Մարզի համայնքների բյուջեների աշխատավարձի եւ պարտադիր սոցապահովության վճարների առումով, դեկտեմբերի 1-դրությամբ պարտքեր չկան:
Անուշ ԲՈՒԼՂԱԴԱՐՅԱՆ
