2010 թվականին սկիզբ առած «Հայաստանում աշխատանքային միգրացիայի գիտավերլուծական կառավարման հզորացում» վերնագիրը կրող ծրագիրը արդեն երկրորդ տարին է, ինչ իրականացվում է մեր երկրում:
«Այս ծրագրի հիմնական նպատակը դեպի Եվրոպական Միության անդամ
երկրներ ուղղված աշխատանքային միգրացիայի անկանոն հոսքերը կարգավորելն է: Նախքան այս ծրագիրն սկսելը, դեռ 2006 թվականին` մեկ այլ ծրագրի շրջանակներում, ֆիլմեր ենք նկարել, գնացել-հասել ենք Եվրոպա, հանդիպել ենք մեր համաերկրացիների հետ ու փորձել ենք պարզել նրանց խնդիրները»,- այսօր «Մարդկային զարգացման միջազգային կենտրոն» հ/կ-ում լրագրողների հետ հանդիպման ժամանակ ասաց կազմակերպության գործադիր տնօրեն Արմեն Գալստյանը:
Ըստ նրա` անցած երկու տարիների ընթացքում իրենց հաջողվել է ծրագրի շրջանակներում որոշ ձեռքբերումներ ունենալ,սակայն դեռ անելիքներ ունեն:
Կարդացեք նաև
Չորս հիմնական բաղադրիչ ունեցող ծրագիրը նաեւ նպատակ ունի Եվրոպային ներկայացնել հայաստանյան աշխատուժը:
«Մեր գլխավոր նպատակներից մեկն է ստեղծել տեղեկատվական հարթակ, որի միջոցով եվրոպացի գործատուն կկարողանա ճանաչել իր հայ աշխատողին, իսկ հայ աշխատողը` իր հերթին, կկարողանա օգտվել զբաղվածության որակյալ ծառայություններից»,- ասաց կազմակերպության գործադիր տնօրենը` ընդգծելով, որ իրենք այս առիթով ուսուցողական դասընթացներ են կազմակերպել մարզերում եւ մայրաքաղաքում:
Միգրացիայի միջազգային կազմակերպության ծրագրերի մշակման եւ իրականացման բաժնի ղեկավար Քրիստինա Գալստյանի կարծիքով` ծրագրի շրջանակներում նաեւ պայքար է գնում թրաֆիքինգի դեմ ու աջակցություն է ցուցաբերվում կամավոր հայրենիք վերադարձողներին:
Aravot.am-ի այն հարցին, թե արդյոք ծրագիրը իր մեջ պարունակում է արտագաղթը զսպող գործառույթ, Միգրացիայի միջազգային կազմակերպության ծրագրերի մշակման եւ իրականացման բաժնի ղեկավարը պատասխանեց.«Մենք պետության ֆունկցիա մեզ վրա չենք ստանձնել: Մենք չենք կարող օրենքներ ընդունել կամ փոխել: Մենք այս հարցում միայն օգնում ենք պետությանը: Մեր միջոցով միգրացիան բերվում է օրինական դաշտ: Եթե Եվրոպա գնալու համար օրինական դաշտ ստեղծվի, ապա կարծում եմ, որ արտագաղթն ինքնին կզսպվի»:
Հիշեցնենք, որ «Հայաստանում աշխատանքային միգրացիայի գիտավերլուծական կառավարման հզորացում» ծրագիրն իրականացվում է ԵՄ-ի ֆինանսավորմամբ եւ Մարդկային զարգացման միջազգային կենտրոնի եւ Միգրացիայի միջազգային կազմակերպության կողմից:
Աշոտ ԱԹԱՅԱՆ
